(AP) – Twitter ta adverti cu gobiernonan rond di mundo ta pidiendo pa e compania kita contenido of busca detayenan priva di e usuarionan na un cantidad alarmante.
E compania di rednan social a revela den un reportahe nobo cu nan a ricibi un cantidad record di demandanan lega, casi 60,000 den e periodo di 6 luna di aña pasa, di parti di gobiernonan estatal, local y nacional cu tabata kier pa Twitter kita contenido di varios cuenta of revela informacion condifencial manera mensahenan y e localidad di usuarionan.
“Nos ta mirando gobiernonan bira mas agresivo den e manera cu nan ta purba haci uso di tacticanan legal pa desenmascara e personanan cu ta haci uso di nos servicio, colectando informacion di e doñonan di e cuenta y tambe haciendo uso di demandanan legal como un strategia pa silencia e personanan,” Yoel Roth, president di Twitter su integridad y siguridad a bisa den un conversacion riba e sitio web diahuebs.
Merca ta encarga di mayoria di e demandanan pa informacion di cuentanan, reponsabel pa 20% di e peticionnan. India ta den di dos luga. Twitter ta bisa cu nan a cumpli completamente cu mas o menos 40% di tur e peticionnan pa informacion di e cuenta di usuarionan.
Hapon, cual tambe ta haci peticionnan frecuenta pa informacion, ta haci e cantidad mas grandi di peticion pa Twitter kita cierto contenido for di algun cuenta. Hapon a haci mas di 23,000 peticion, cual ta e mita di tur e peticionnan, pa kita contenido. Rusia ta den di dos luga den e categoria aki.
Meta, cual ta doño di Facebook y Instagram tambe a reporta un aumento den e peticionnan di parti di gobierno pa informacion priva di usuarionan y otro datonan.
