(AP) – Usuarionan di Twitter no lo por conecta nan cuenta na cierto sitionan web rival di e plataforma, incluyendo loke e compania a describi como “plataforma prohibi” Facebook, Instagram y Mastodon.
Esaki ta marca e movida mas recien di Twitter su doño nobo Elon Musk pa tuma accion contra cierto mensahenan despues cu el a suspende un cuenta siman pasa cu tabata publica e paradero di su jet priva. “Nos sa cu hopi di nos usuarionan por ta activo riba otro plataformanan social, bayendo dilanti, Twitter no lo permiti promocion gratis di plataformanan specifico riba Twitter,” e compania a bisa den un declaracion.
E plataformanan prohibi ta inclui sitionan web comun manera Facebook y Instagram, ademas di rivalnan nobo manera Mastodon, Tribel, Nostr, Post y ex president di Merca Trump su plataforma Truth Social. Twitter no a duna splicacion p cu e decision aki y dicon e no ta inclui sitionan manera TikTok, Parler of LinkedIn.
Twitter a bisa cu nan lo por lo menos temporariamente suspende cuentanan cu ta inclui e cuentanan prohibi aki riba nan perfil. Sinembargo e practica ta asina comun cu te ainda no ta cla si y con e compania lo aplica e restriccion aki riba Twitter su miyones di usuario rond di mundo. Tambe e compania lo prohibi promocion di sitio web manera Linktree, cual algun persona ta usa pa mustra unda nan por ser haya riba diferente plataforma.
Anteriormente Twitter a tuma accion pa blokia link di un i su rivalnan, Mastodon, despues cu su cuenta principal di Twitter a publica tocante e controversia di e jet siman pasa. Mastodon a mira un cremento grandi den simannan recien como un alternativa pa usuarionan di Twitter cu no ta contento cu e maneho di Musk desde cu el a cupra esaki pa 44 biyon dollar fin di october y a cuminsa restaura cuentanan suspendi bao e maneho anterior di Twitter.
Algun usuario di Twitter a inclui link pa nan perfil riba Mastodon y ta encurasha nan siguidornan pa siguinan riba e plataforma nobo. Esaki awo ta prohibi riba Twitter, di mesun manera cu purba evadi e restriccionnan aki pa medio di skirbi “instagram dot com” conhuntamente cu e usuario.
Instagram y Facebook su compania Meta no a duna comentario tocante esaki te ainda. Twitter a bisa cu si nan lo permiti “avisonan y promocionnan paga” di e plataformanan aki, ademas di “publica contenido originalmente publica riba un di e plataformanan aki.”
