Recientemente, Organisacion di Trabao Temporal (TWO), cu ta traha hunto cu Aruba riba implementacion di e reformanan relaciona cu e Landspakket cu Hulanda a acorda cu Aruba, a publica su Rapport Anual 2024. Den esaki, a dedica un capitulo na salubridad publico na Aruba.

Edwin Brugman ta un consehero di cuido di salud y ex-director di asociacion di proveedornan di cuido VvAA na Hulanda. E tin background den administracion, consultancy y rolnan di supervision, y tin experiencia extenso den e financiamento y organisacion di cuido di salud. Despues di traha pa un tempo como consehero pa ministerio di Salubridad Publico na Aruba, na mita di 2023 el a keda nombra como coordinador independiente di e Acuerdo di Cuido di Salud firma na Aruba.

“Cuido di salud na Aruba ainda ta hopi pagable y tambe accesible pa tur ciudadano, y cu un desaroyo positivo di economia cu ta spera pa keda asina pa algun tempo. Pero manera tur otro pais, Aruba mester ta critico den e alocacion di recurso. Cooperacion entre proveedornan di cuido di salud y institucionnan, y construi confiansa entre e sector, seguro, y politica ta esencial,” Brugman a bisa. “Hunto nos mester confronta e retonan: enbehecemento, tension den mercado laboral, y presion aumentando riba cuido di salud pa motibo di malesanan cronico, manera diabetes y condicionnan relaciona cu diabetes. Por logra esaki mediante cooperacion mas efectivo entre stakeholdernan den sector di cuido di salud: AZV, e institucionnan, y e proveedornan di cuido.”

Esaki ta e motibo pakico, na 2023, e Acuerdo di Cuido di Salud pa Organisacion Sostenible di Salud na Aruba a keda firma pa e stakeholdernan clave den e sector na Aruba:

Ministerio di Salubridad Publico,
Organisacion General di Implementacion di Seguro di Salud (AZV),

Institucionnan di cuido di salud, y
Representantenan di proveedornan di cuido di salud.

Segun TWO, na 2024 a tuma stapnan concreto pa duna forma na e acuerdo.
A nombra Brugman na 2023 como e coordinador independiente di e Acuerdo di Cuido di Salud firma. E tabata involucra caba den formacion di e acuerdo hunto cu profesor Dr. Patrick Jeurissen, economista di salud afilia cu Radboud UMC. Ministerio di Turismo y Salubridad Publico (den Gabinete Wever-Croes) a pidi profesor Jeurissen, dentro di e marco di e Landspakket, pa duna conseho riba e sostenibilidad structural di cuido di salud a largo plaso.

Despues di firma e Acuerdo di Cuido di Salud, stakeholdernan a sinti e necesidad pa un partido independiente guia e implementacion di e proyectonan resultando di e acuerdo. Den su rol como coordinador, Brugman ta monitoria progreso y ta sigura e participacion di tur partido relevante. Brugman ta splica pakico e acuerdo aki ta asina importante pa Aruba.

Miho comprension
 E Acuerdo di Cuido di Salud ta resultado di consulta intensivo entre stakeholdernan tocante e futuro di cuido di salud na Aruba.

“Tur partido involucra ta realisa cu nan mester logra cu recurso scars. E realisacion aki ta duna un base solido pa e compromiso pa conhuntamente duna forma na un sistema di cuido di salud cu ta prepara pa futuro. E necesidad pa comprension mutuo, scucha di otro y tuma otro na serio a bira mas y mas aparente den e proceso aki. Y esey ta crea un dinamica diferente,” Brugman a bisa.

“E reto awo ta pa mantene e actitud abierto aki y no cay back den patronchinan bieu,” el a continua. “Esey ta un tarea pa tur esnan involucra. Den mi rol como coordinador, mi ta purba contribui na esey, specialmente door di clarifica rol y expectativa. E implementacion di e acuerdo ta pasa riba cuatro fluho di trabao cu ta involucra diferente topico y diferente participante. Hunto nan ta forma un unidad completo, y e gruponan di trabao ta conecta cu otro. E coherencia aki ta importante. Na mes momento, tambe ta yuda ora ocasionalmente nos tuma un stap atras pa mira con cos ta bayendo en general. Den esaki, mi ta purba di ta e spiel y e conector.”