(AP) – Britania a otorga autorisacion condicional riba diahuebs na e prome pildo cu a comproba di exitosamente trata COVID-19 te cu aweo. Tambe e ta e prome pais cu a duna aprobacion na e tratamento di e fabricante di farmaceutico Merck, aunke e no tabata inmediatamente cla con lihe e pildo lo ta disponibel.

E pildo a ser licencia pa adultonan di 18 aña bay ariba cu a test positivo pa COVID-19 y tin por lo menos un factor cu ta pone nan den riesgo di desaroya malesa severo, manera por ehempel obesidad of malesa di curason. Pashentnan cu COVID-19 leve te cu modera lo tuma 4 pildo di e tratamento, conoci como molnupiravir, 2 biaha pa dia pa 5 dia.

Un pildo antiviral cu ta reduci sintoma y ta duna mas velocidad na e recuperacion lo comproba di ta un gran avance, yudando combati e casonan y kita e presion di hospitalnan, pero tambe lo yuda evita brotenan den paisnan di menos recurso unda cu tin sistema di salud mas fragil. Ademas, e lo yuda combati e strategia dobel pa cu e pandemia, cual ta di tratamento pa medio di medicina, y prevencion, primeramente pa medio di vacuna.

Molnupiravir tambe tin un reviso pendiente cu reguladornan di Merca, e union Europeo y algun otro pais. E U.S Food and Drug Administration a anuncia luna pasa cu nan lo solicita un panel di expertonan independiente pa pone den reviso e pildo su siguridad y efectividad den fin di november.

E cantidad di pildo inicial lo ta limita. Merck a bisa nan por produci mas o menos 10 miyon tratamento te cu fin di aña, pero hopi di e cantidad aki ya a keda cumpra pa gobiernonan mundialmente.

Den october, oficialnan di U.K a anuncia cu nan a sigura 480,000 curso di e tratamento cu Molnupiravir y a premira miles di ciudadano Britanico lo tin acceso na e tratamento nobo pa medio di un estudio cu lo conduci na nivel nacional.

 

“Awe ta un dia historico pa nos pais, mirando cu awo U.K ta e prome pais na mundo cu ta aproba e uso di un antiviral cu por tuma na cas pa COVID-19,” Secretario di salud Britanico Sajid Javid a declara.

“Nos ta trahando na un bon velocidad den henter e gobierno y cu NHS pa distribui Molnupiravir na pashentnan pa medio di un estudio conduci na nivel nacional lo mas lihe cu ta posibel,” el a bisa durante su declaracion, refiriendo na U.K su National Health Service. Dokternan ta bisa cu e tratamento lo ta particularmente bon pa personanan cu su curpa no ta reacciona bon na vacunaciom.

 

LEAVE A REPLY

Please enter your comment!
Please enter your name here