(AP)—Rusia a lansa casi 500 drone riba Ucrania den e bombardeo di drone mas grandi den e guera di tres aña, segun e forsa aereo Ucraniano a bisa dialuna, mientras e Kremlin ta continua cu nan ofensivo en medio di discusionnan di paz cu te ainda no a duna ningun progreso pa caba cu e bringamento.
A pesar di e dificultad pa yega na un alto al fuego, Rusia y Ucrania a intercambia un otro ser di prisonero di guera dialuna.
Ademas di 479 drone, a lansa 20 misil di varios tipo na diferente parti di Ucrania entre diadomingo y dialuna, segun e forsa aereo, cual a bisa cu e bombardeo tabata dirigi mayormente riba e areanan central y occidental.
E forsa aereo di Ucrani a bisa cu su defensanan a intercepta y a destrui 277 drone y 19 misil, bisando cu apenas 10 drone of misil a dal nan blanco. Oficialnan a bisa cu un persona e keda herida. No tabata posible pa verifica e declaracionnan aki independientemente.
Un escalacion recien den atakenan aereo a coincidi cu un empuhe di Rusia riba tereno di bataya den e partinan oriente y norteste di e frente di casi 1.000 kilometer largo.
Oficialnan Ruso a bisa cu e asaltonan intenso tabata parti di un serie di atakenan reciproco pa e atake di drone for di Ucrania riba basenan aereo cu tabata hospeda bombernan strategico cu capacidad nuclear. Un atake riba un base aereo Ucraniano na Dubno, den e region di Rivne, tabata un di nan respuesta, e ministerio di Defensa Rusia bisa dialuna.
Dos ronda di discusionnan di paz entre delegacionnan di Rusia y Ucrania na Istanbul no a mira ningun logro significativo, cu e excepcion di e intercambio di prisoneronan di guera como tambe miles di trupanan morto y herida. Presidente Ruso Vladimir Putin a indica cu e lo sigui bringa te ora cu Ucrania cumpli cu nan condicionnan.
