(AP) — Nacionnan di Union Europeo a reconoce ayera cu nan por ta na caminda pa faya Ucrania riba nan promesa pa duna e municion cu e pais mester desesperadamente pa frena e invasion di Rusia y recupera teritorio ocupa.
Cu gran fanfaria na comienso di aña, lidernan di UE a priminti di provee 1 miyon ronda di municion pa e linea frontal di Ucrania pa spring di 2024, un cantidad cu lo nifica un aumento serio di produccion. Pero e bloc di 27 nacion, cu pa mas cu mita siglo ta biba den un mensahe di “paz, no guera” y refugia bao paraplu militar di Merca, ta hayando dificil pa bin cu e producto.
“No ta bay logra e 1 miyon, bo mester asumi esey,” Minister di Defensa Aleman, Boris Pistorius a bisa.
Despues di un reunion ayera di ministernan di Defensa y Exterior di UE na Brussels, hefe di politica exterior di UE, Josep Borrell tambe a pone duda riba e meta. “Pues talbes pa maart nos no ta bay tin e 1 miyon ronda,” Borrell a bisa.
Minister di Defensa di Estonia, Hanno Pevkur a bisa cu ta crucial pa aumenta e suministro di municion. “Wak Rusia. Nan ta produciendo awo mas cu nunca. Nan ta hayando shell for di Nort Korea. Europa no por bisa cu… ‘Rusia y Nort Korea por cumpli y nos no por,’” el a bisa.
A entrega como 300mil ronda for di suministronan existente dentro di UE te awo. Cu e resto birando cada bes mas elusivo pa haya prome cu spring, minister di Defensa Latvio, Andris Spruds a insisti cu no mester tuma e meta original demasiado literalmente. “Bon, obvio, un miyon ronda ta simbolico. Mi ta kere aspiracion y ambicion ta importante,” el a bisa.
Riba campo di bataya, sinembargo, e presencia di municion ta lo unico cu ta conta.
Den e guera di Ucrania cu Rusia, rondanan di artileria di 155mm ta hunga un rol crucial. E consumo diario di 6mil pa 7mil shell ta resalta su importancia strategico. Adkeri 1 miyon shell asina lo sigura stabilidad pa Ucrania pa al menos mita aña, dunando un bentaha substancial den operacionnan sosteni y flexibilidad riba campo di bataya, segun observadornan.
Comisionado di UE, Thierry Breton a insisti cu e meta di produccion di e industria, di 1 miyon ronda, por keda cumpli “pero awo ta keda na estadonan miembro pa pone nan bestelling.”
Sinembargo, miembronan di UE a culpa e productornan. “Nos tur a firma contract. Nos a haci procuramento conhunto. Pues awo industria mester entrega. Mester aumenta su wega pa produci mas,” segun minister di Defensa Hulandes, Kajsa Ollongren.
Breton a reconoce cu e sobredependencia di UE riba asina-yama poder suave, y decadanan di presupuestonan reduciendo na hopi nacion Europeo, a laga e bloc exponi. “Manera boso sa bon, ta historia, sigur e dividendo di paz. Ta berdad cu nos a cay un tiki, hasta significantemente, den nos capacidad di produccion, pero e base inicial ainda t’ey” pa aumenta produccion di nobo, el a bisa.
Un manera pa haya mas municion, segun Borrell, ta pa redirigi exportacion actual di UE y duna prioridad na Ucrania. “Como 40% di e produccion ta siendo exporta na paisnan tercero,” el a bisa. “Pues talbes loke nos mester haci ta purba di pasa e produccion aki na esun di prioridad, cu ta e Ucranianonan.”
