(AP) — Comision Europeo a bisa ayera diabierna cu a duna e app di video Chines, TikTok, un luna pa responde na kehonan di un grupo di consumidor Europeo tocante su practicanan comercial.
Brasa ehecutivo di Union Europeo a bisa cu a cuminsa discusionnan involucrando e plataforma di red social y e autoridadnan nacional di consumidor despues di un alerta lansa anteriormente e aña aki door di Organisacion di Consumidor Europeo (BEUC) tocante supuesto violacionnan di derechonan di consumidor.
E comision a bisa cu algun termino contractual den politicanan di TikTok por wordo considera engañoso y confuso pa consumidornan, agregando cu preocupacionnan relaciona na asuntonan incluyendo marketing scondi y strategianan di aviso enfoca riba mucha a keda expresa.
TikTok ta un app enormemente popular entre adolescente y adultonan hoben cu ta us’e pa post y mira videonan cortico.
Na februari, BEUC a entrega un keho cerca Comision Europeo y e red di autoridadnan di proteccion di consumidor contra TikTok. A argumenta cu varios termino den ‘Terminonan di Servicio’ di TikTok ta inhusto y a bisa cu e plataforma a faya di protege mucha y adolescentenan for di avisonan scondi y contenido potencialmente dañino.
“E pandemia actual a acelera digitalisacion mas ainda”, segun Didier Reynders, Comisionado pa Husticia. “Esaki a trece oportunidadnan nobo pero tambe a crea riesgonan nobo, en particular pa consumidornan vulnerabel. Den Union Europeo, ta prohibi pa enfoca riba mucha y menornan di edad cu avisonan scondi manera bannernan den video. E dialogo cu nos ta lansando awe mester sostene TikTok den cumpli cu reglanan di UE pa protege consumidornan.”
TikTok a bisa cu ta cumpli cu ley y regulacionnan local gobernando aviso pa hobennan. E compania a ‘tuma un cantidad di stap pa protege nos usuarionan mas jong, incluyendo haci tur cuentanan bao 16 aña priva by default, y deshabilita nan acceso na mensahe directo’, director di TikTok pa politica publico pa Europa, Caroline Greer, a bisa den un declaracion. “Es mas, usuarionan bao 18 aña di edad no por cumpra, manda of ricibi regalonan virtual, y nos tin politicanan estricto prohibiendo aviso directo apelando na esnan bao edad di consentimento digital.”
