(AFP) – Union Europeo a informa Meta diaranson cu cobra chatbotnan di inteligencia artificial rival pa acceso na WhatsApp ta contra regla di competencia di e bloc, rechasando e medida cu e gigante Mericano a tuma como respuesta na un investigacion.
Meta a cuminsa cobra tarifa na maart como remedi despues cu un investigacion di UE a haya cu compania a “efectivamente” blokia assistent di inteligencia artificial di tercer partido for di e plataforma di mensahe — un violacion di regla di competencia.
Sinembargo, Comision Europeo, autoridad di competencia di UE, a indica cu e solucion no ta satisfactorio.
Comision a indica cu el tin intencion di ordena Meta pa restaura acceso pa assistent di AI di tercer partido na WhatsApp bao di mesun condicion cu tabata existi prome di cambio di politica na october 2025, como parti di medidanan temporal te investigacion termina.
Investigacion, habri na december, ta forma parti di esfuerso di e bloc di 27 pais pa regula companianan grandi di tecnologia, hopi di nan basa na Merca, loke a causa reaccion di presidente Donald Trump.
Meta a integra su propio assistent generativo, Meta AI, den tur su plataformanan, incluyendo Facebook y Instagram, cu ta ser usa pa biyones di hende na mundo.
Restriccionnan di Meta riba rivalnan ta aplica ora AI ta e servicio principal — manera chatbot of assistent — aunke companianan ainda por usa AI pa funcionnan secundario, manera servicio di cliente via WhatsApp.
Reguladornan di UE ta preocupa cu limita mas cu tres biyon usuario di WhatsApp na Meta AI por duna compania bentaha comercial riba chatbotnan rival, specialmente esnan chikito cu ta drenta mercado.
Comision a informa diaranson cu investigacion a ser amplia pa Italia y awor ta cubri henter European Economic Area (EEA), cu ta inclui 27 estado miembro di UE, mas Islandia, Liechtenstein y Noruega.
Italia tabata exclui anteriormente paso el a cuminsa su propio investigacion separa tocante e caso.
