Na entrada di 2026, United Farmers Association of Aruba (UFA) ta expresa su speransa cu confianza pa e aña cu ta bini y ta reafirma su compromiso pa fortalece produccion local di cuminda como un pilar esencial pa resiliencia nacional.
E interupcionnan cu Aruba a sinti despues di e eventonan di 3 di januari na Venezuela, cu a resulta den cancelacion di hopi vuelo y inseguridad logistico, a sirbi como un recordatorio claro, similar na loke nos a biba durante COVID-19, di conlihe evento externo por afecta e cadena di suministro di nos isla. E momentonan aki ta mustra cu soberania alimentario mester keda un prioridad strategico. Aruba no por perde di bista e lesnan cu a siña den tempo di crisis, ora acceso na importacion por ser limita y capacidad local ta bira crucial.
UFA constantemente a enfatisa e importancia di incentiva y proteha nos comunidad di agricultor. Agricultornan local no ta solamente productor di cuminda; nan ta un salvaguardia importante pa Aruba, manteniendo e conocemento, capacidad y infrastructura necesario pa garantisa continuidad di suministro di alimento ora sistema internacional ta ser interumpi.
Mientras condicionnan regional ta stabilisa y mercado ta bolbe na normal, UFA ta adverti gobierno y comunidad pa no bolbe cay den un dependencia excesivo riba produccion importa barata. Asequibilidad di corto plaso no mester socava resiliencia di largo plaso. Sosten continuo di politica ta esencial, incluyendo acceso na tera, awa, utilidadnan electrico, financiamento y tecnologia, asina tambe extension y mehoracion di incentivo fiscal existente cu ta permiti agricultornan local keda competitivo pa reinverti den sistema di produccion moderno, eficiente y sostenible. Esaki lo yuda garantisa cu agricultura local por keda viabel y competitivo na largo plaso.
United Farmers Association of Aruba ta mira 2026 cu bon speransa, convenci cu, cu prioridadnan claro y compromiso consistente, Aruba por sigui construi un sistema alimentario mas fuerte, mas autosuficiente y mas resiliente, cu ta sirbi tanto e agricultornan como e comunidad mas amplio.
