Diaranson merdia a tuma luga tratamento di caso cu candidato pa minister Mike de Meza a entama contra Departamento di Impuesto, relaciona cu e proceso di screening pa su nombramento como minister.

E yegada di de Meza na corte tabata marca pa un cantidad di su sostenedornan como tambe di partido AVP cu tabata pafo brindando apoyo y palabranan di aliento na e candidato pa minister mientras e hunto cu su team tabata cana den direccion di portanan di corte.

Pa loke ta trata e tratamento di e caso mes esaki a inicia cu hues puntrando de Meza kico ta e esencia di e caso y dicon esaki ta uno importante pa su persona, na cual de Meza a contesta cu durante e ultimo lunanan el enfrenta un cantidad di critica contra su persona, su caracter y su integridad, cu e ta remarca ta simplemente falso.

De Meza a subraya cu ta importante pa su persona pa e situacion aki termina no solamente pa e por bira minister, pero tambe pa termina cu e difamacion cu de Meza mester a enfrenta di parti di politiconan di oposicion riba rednan social y den algun medio di comunicacion.

El a splica na hues cu e caos aki a cuminsa pa motibo cu el a pidi un declaracion di fiscaal gedrag na Departamento di Impuesto (DIMP), ya cu esaki a ser pidi pa e formador, awor prome minister Mike Eman, pa asina e por nombrele minister di su gabinete, pero DIMP no a kier duna de Meza esaki.

Assistent di Desiree Croes, abogado di de Meza, Sr. Edwin Duijneveld a trece dilanti e punto di un “voorlopig voorziening”, cu ta un declaracion temporal emiti pa e hues mes cu de Meza lo por haci uso di dje despues cu e hues dicta su veredicto.

Despues abogado Croes argumenta cu henter e proceso aki a pone un mancha riba integridad y nomber di su cliente. Un pregunta cu e abogado a trece dilanti ta relaciona cu e hecho cu a pesar cu DIMP mes a indica cu de Meza no tin debe mas ni tampoco areglo di pago na e momento aki, pakico DIMP no kier duna su cliente e declaracion cu a ser pidi pa asina por entrega esaki na e formador, awor prome minister. Pero segun abogado Croes, DIMP no ta duna un motibo pakico no kier haci esaki.

E abogado a resalta cu si DIMP tene na cuenta solamente cu e aspecto si un individuo paga su impuesto y entrega su papelnan semper na tempo, e ora ningun persona lo por haya un declaracion pasobra, segun e abogado a conta di su propio experiencia, ta completamente posibel pa un persona faya den algun ocasion y no entrega e papelnan necesario na impuesto na tempo, of paga locual mester paga na tempo.

El a hasta menciona cu su cliente en berdad no semper a cumpli cu e deadlinenan pa entrega su papelnan na tempo, pero el a indica cu esaki ta simplemente hacie humano.

Awor de Meza a guma e pasonan necesario pa pone tur su cosnan den orde y a paga loke mester a paga, sin areglo, pa cual el a pidi un declaracion nobo, cu ta relevante pa e proceso di screening pa minister, cual ta unda e desacuerdo entre e partidonan ta sinta.

Di su banda directora di DIMP, Gomez-Pieters, a splica con e proceso a cana, e entregamento di carta y peticion di parti di e de Meza y su ekipo y tambe a indica con e proceso tin cu cana y kico ta e condicionnan cu mester cumpli cune pa por ricibi un declaracion di fiscaal gedrag, manera cu esun cu de Meza ta pidi.

El a clarifica cu no tin ningun tipo di discriminacion of atake personal contra de Meza, pero ta simplemente con e proceso ta cana, y ta basa riba e naturalesa di peticion cu de Meza a haci, cual ta pa minister, cu ta forma parti di un proceso di screening mas rigoroso cu mester tuma luga.

El a remarca cu no ta den man di DIMP pa dicta si un candidato pa minister por bira minister. Esaki ta den man di e formador cu ta basa su decision riba e resultado di investigacion di diferente entidad, no solamente DIMP.

 

Pa loke ta hues, anteriormente e hues encarga cu e caso a manda un lista di pregunta pa ambos partido y a pidi contesta riba e preguntanan aki prome cu e tratamento di e caso a tuma luga, cual e partidonan a cumpli cune. Durante tratamento, despues cu ambos partido a presenta nan argumentonan, hues a dirigi algun pregunta na ambos banda pa asina por tin informacion mas concreto y corecto posible pa e por tuma su decision, cual el a dicta durante uitspraak cu lo tuma luga diaranson 4 di juni pa 4or di atardi.

Despues cu e tratamento a termina na salida di corte de Meza su sostenedornan tabata en espera di dje ainda y hunto cu su ekipo el a duna un declaracion na prensa.

Abogado Croes a expresa cu nan a sali “cu un sentimento hopi positivo” y a indica cu nan a sinti cu hues a “dal e clabo riba su cabes” y a puntra tambe pakico eigenlijk ta tratando de Meza diferente cu otro ciudadano na nos pais.

“E punto di mas importante ta cu no por tin un discriminacion. Ta trat’e diferente cu henter un storia unda ta acus’e di mil y un cos. Y hues a puntra tambe si el a paga tur cos, esey a ser ripiti por lo menos cinco pa seis biaha awe cu tur cos ta paga, no tin niun debe, no tin nada cu por stroba de Meza di haya su declaracion di fiscaal gedrag,” el a indica.

Di su banda de Meza a expresa cu e situacion cu ta andando ta incomprendibel. El a indica cu tin weganan politico ta ser hunga y mirando kico ley ta prescribi, con e screening tin cu tuma luga, y mirando con ambtenaarnan ta husga su persona incorectamente, skirbi cosnan sugestivo, acusacionnan cu no ta corecto y ta usa esey continuamente, e no por keda keto mas.

“Crea ambiente negativo pa perhudica un politico, of un partido politico of un direccion di politica na Aruba, esey ta algo cu ami ta rechasa fuertemente. Hopi hende porta a hala atras, pero ami ta para contra di tur inhusticia, hasta si mi tin cu para mi so mi lo para contra esey,” el a enfatisa.

El a expresa cu e situacion aki ta un smaak amargo y ta haci cu e ta cuestiona kico ta e storia tras di e storia y kico ta e intencionnan den esaki. “Ta gewoon increibel cu ta bay 16 aña atras riba algo cu no ta existi pa crea un ambiente como si fuera cu e tempo ey a haci algo. Ley ta papia di ultimo cinco aña atras pa busca, pero DIMP a bay mas cu esey,” el a subraya.