27 conferencia seguridad (19).JPG

Segun Sr. Rene Bernabela di sindicato TOPA,  den fin di siman cu a pasa, a sigui reuni cu otro sindicato y comerciantenan haciendo diferente trabao di logistica unda a haya mas confirmacion di otro sindicatonan cu a uni na e grupo y e comision pro siguridad pa e marcha contra criminalidad e siman aki. E comision aki ta haciendo un apelacion no solamente na sindicatonan y comerciantenan, pero na henter pueblo di Aruba y tur cu ta preocupa cu situacion di  insiguridad na Aruba.

E comision cu a lanta pa manifesta contra criminalidad, tabata tin un rueda di prensa dialuna mainta caminda nan a enfatisa cu e prioridad di gobierno mester cambia. Tur e proyectonan andando ta hopi bunita y positivo pero segun e comision aki, e prioridad mester bin na entre otro busca mas personal den departamentonan di husticia , como tambe ekipo y material rekeri pa por apropiadamente bringa criminalidad. Algun di e sindicatonan cu ta confirma di uni forsa pa e marcha te na momento aki ta sindicato STA, TOPA, SCCA,  UPA,  sindicato di WEB cual ta SIWA. Tambe pendiente tin sindicato di aduana y di Setar cual actualmente ta reuniendo cu nan miembronan pa asina trece informacion na kico ta e proposicion pa dia 29 di september, como tambe pa haya e mandato di nan miembronan pa nan uni na e grupo y haci esaki mas grandi.  ”Na Aruba den momentonan aki tin un crisis. Tin un crisis pa locual ta toca e parti di criminalidad, y manera nos por wak riba medianan social, esaki ta continua den diferente forma manera ladronicia, atraco y menasa cu arma di candela. Ta pa e motibo aki nos ta haciendo un apelacion na henter pueblo di Aruba pa bini dia 29 di september, cuminsando 4or di atardi dilanti di Post Kantoor na  Playa,” Sr. Rene Bernabela ta bisa. E ruta di e marcha ta cu intencion pa pasa na diferente instancianan encarga cu husticia, entre otro Palacio di Husticia, Ministerio Publico,  warda di Polis na Playa y pa termina dilanti di Bestuurskantoor unda lo otorga nan preocupacionnan na e mandatarionan encarga cu pais Aruba.  

21 punto di prioridad pa criminalidad

Sr. Bernabela a bini cu un papel caminda ta ilustra cu na Augustus 2013, durante un dialogo social, tabata tin temanan cu a wordo discuti cu diferente gremionan den nos comunidad.  ”Minister President, Mike Eman cu Minister di Husticia Sr. Arthur Dowers, a firma y compromete nan mes den 2013 riba 21 punto di prioridad pa cu criminalidad. Awe den 2016, ainda nos no por haya e 21 puntonan aki. Cu nos ta sostene e otro tres sindicatonan cu a manda nan punto di preocupacion ta un hecho, pero di otro banda, comision pro siguridad y contra criminalidad ta bisa awo cu ta basta,” Sr. Bernabela ta bisa. 

 

Comerciantenan ta cansa cu kibramento den negoshi

Sr. Hubert Dirks, comerciante di Compra hunto cu Tatiana Eman di Benneton y Circle K, ta enfatisa cu nan accion ta algo cu ta bay hopi mas leu cu sindicatonan y comerciantenan. Actualmente segun e comerciantenan aki ta comenta, nan ta sinti fastioso cu cada mainta e prome cos cu nan mester verifica ta si ningun hende no a kibra den nan negoshi. Nan a menciona tambe cu e fin di siman aki mes cu a pasa tabata tin un atraco unda a drenta den hende su cas atrobe, maltrata nan y horta nan pertenencianan. Ta pa e motibo aki nan ta enfatisa cu no ta comerciante so ta sintiendo e molester aki, pero cu ta algo cu a yega te na porta di nos cas tambe y ta mustra di a cuminsa empeora. ”Esaki ta trata di abo, ami y nos famia. E marcha akinan ta un marcha di ciudadanonan preocupa. Esaki ta ciudadanonan cu ta sinti cu siguridad a bay perdi na Aruba. Hende cu temor pa sali y keda na cas. Insiguridad no a solamente yega na nos negoshinan, el a drenta na nos casnan tambe,” Sra. Tatiana Eman ta bisa. 

 

LEAVE A REPLY

Please enter your comment!
Please enter your name here