(AP) — Rusia a lansa un atake aereo grandi riba Kyiv diahuebs tempran cu a inclui un atake incomun na e centro di e capital di Ucrania, matando por lo menos 21 persona, heridando 48 y destruyendo oficinanan diplomatico di Union Europeo, segun autoridad.
E bombardeo di drone y misil tabata e prome atake grandi Ruso riba Kyiv den e ultimo simannan mientras esfuersonan di pazpaz dirigi pa Merca pa termina e guera di tres aña tabata lucha pa haya sosten. Gran Britania a bisa cu e atake a sabotia esfuersonan di paz, mientras e diplomatico mas halto di EU Kaja Kallas a yama e enviado di Rusia na EU pa Brussels tocante e atakenan cu a destrui oficinanan di EU.
E Conseho di Seguridad di UN a programa un reunion di emergencia riba atakenan aereo en contra di Ucrania diabierna atardi na peticion di Ucrania y e 5 miembro Europeo di conseho — Gran Britania, Francia, Slovenia, Dinamarca y Grecia. Dos di e enviadonan mas halto di Ucrania tabata programa pa reuni diabierna cu e administracion di Trump tocante mediacion.
E Kremlin a bisa cu Rusia a keda interesa den continua negociacion di paz a pesar di e atake aereo diahuebs, cu tabata un di e mas grandi di e guera desde cu el a cuminsa na 2022.
Entre e mortonan tabatin 4 mucha entre 2 y 17 aña, Tymur Tkachenko a bisa, e cabes di administracion di ciudad di Kyiv. El a bisa cu mas hende por ta bao di e escombro ainda, y esfuersonan di buskeda y rescate a continua diahuebs anochi.
Tambe diahuebs, e administracion di Trump a aproba un benta di arma na Ucrania di $825 miyon cu lo inclui misil di distancia largo y equipo relaciona pa aumenta su capacidad defensivo mientras esfuersonan di Merca pa sirbi di intermediario entre Ucrania y Rusia ta parce a keda stanca. E Departamento di Estado a bisa cu Ucrania lo usa financiamento for di e aliadonan di NATO Dinamarca, Hulanda y Norway riba e financiamento militar di Merca pa paga e equipo.
Atake raro na centro di Kyiv
E atake tabata un di e poco bes cu drone y misil Ruso a penetra e curason di Kyiv desde cu e invasion total a cuminsa.
E Forsa Aereo di Ucrania a bisa cu Rusia a lansa 598 drone di atake y 31 misil di diferente tipo den e pais tempran diahuebs, grandimayoria di nan cu a dal blanconan na Kyiv.
Por lo menos 33 sitio rond di tur 10 distrito di e ciudad a ser afecta directamente of destrui , Tkachenko a bisa. Miles di bentana a kibra manera casi 100 edificio a ser destrui, incluyendo un centro comercial den e centro di ciudad.
Rusia ta bisa cu nan a ataca un ‘zona militar-industrial’
E Ministerio di Defensa di Rusia a bisa cu nan a ehecuta un atake contra e base aereo militar y companianan “den e zona militar-industrial di Ucrania” usando arma di distancia largo, incluyendo misil Kinzhal.
“Tur obheto designa a ser golpia,” e ministerio a bisa den un declaracion.
Ucrania a aumenta produccion di arma domestico pa lucha e invasion di Rusia. Hopi fabrica di arma ta opera den scondi, cu algun integra den areanan civil cu defensa aereo superior. Atake indiscriminatorio Ruso alegando pa ataca e industria di defensa di Ucrania a mata hopi ciudadano.
E Ministerio di Defensa di Rusia tambe a bisa cu nan a tira abou 102 drone Ucraniano durante anochi, mayoria den e surdeste di e pais. Un atake di drone a causa un candela na e refineria di petroleo Afipsky den e region di Krasnodar, segun funcionarionan local, mientras un di dos candela a ser reporta na e refineria Novokuibyshevsk den e region Samara.
Dronenan Ucraniano a golpia repetidamente refineria y otro infrastructuranan di petroleo den e ultimo simannan den un intento pa debilita e economia di guera di Rusia, causando stacion di gasolin na algun region Ruso keda bashi y prijs pa aumenta.
E operador di railway nacional di Ucrania, Ukrzaliznytsia, a reporta daño na su infrastructura den e regionnan Vinnytsia y Kyiv, causando atraso y causando trein pa usa rutanan alternativo.
