Recientemente pueblo di Aruba a sinti orguyo ora cu a anuncia cu un hoben local di nos isla, Quiana Cronie, a yega e logro grandi di ricibi e premio Rising Star Award.

E logro aki no solamente ta trata recepcion di e premio, sino tambe e oportunidad di representa nos isla riba escenario internacional y di alto nivel na New York Fashion Week, halsando di nos isla stima mientras e ta hiba su carera na e proximo nivel.

Bon Dia Aruba a haya e oportunidad di papia cu Quiana y conoce e persona sumamente talentoso tras di e marca Cashaca.

Na momento di introduci su mes, Quiana a presenta su mes como un “diseñadora di Aruba, guia pa conta storia, cultura y durabilidad. Creatividad ta un parti di mi bida for di ora cu mi por cuminsa corda. Mi a crece na Savaneta, coriendo pia abao rond di nos cunucu, curioso, subiendo mata, coriendo bais door di e bario, rondona di bestia y semper creando cu mi mannan. Mi mayornan, specialmente mi mama cu ta un artista, a impulsa cu amor e curiosidad aki pa medio di involucra mi den workshopnan di arte for di un edad trempan.”

El a expresa cu loke mas ta defini e como persona ta e conexion profundo cu su herencia, “mi respet pa materialnan y mi creencia cu diseño semper mester carga un nificado su tras. Via paña, obhetonan y conta storia visualmente, mi ta usa diseño como un manera pa preserva storianan, honra resiliencia y crea balornan emocional duradero cu ta uni e dialogo entre pasado y futuro,” el a agrega.

Segun Quiana a sigui conta, inicialmente e tabatin e intencion di studia negoshi pa motibo cu e tabata kier independencia y crea algo di su mes. Sinembargo, durante 2026, el a uni un curso preparatorio na AFADA na Aruba lidera pa Glen Godijn. E experiencia aki tabata uno “transformativo, el a yuda mi realisa cu creatividad no tabata solamente un hobby, e tabata mi yamado.”

El a explora diseño grafico, fotografia y pelicula, pero un punto decisivo a yega ora cu el a “transforma un T-shirt durante un curso. Mi a transforma un T-shirt bieu di AHATA y converti esaki den un declaracion tocante e isla su problema cu dump y a organisa un photoshoot na dump mes. E respuesta tabata sumamente grandi. E momento aki ta loke a resulta den mi prome linea di T-shirt, QC Apparel, cual tabata un exito.”

For di aki, el a muda pa Hulanda pa studia Product Design na Design Academy Eindhoven. Su trabao poco poco a evoluciona y converti den diseño cu por bisti, enfoca riba “forma, funcion, materialnan y durabilidad. Durante tempo, esaki naturalmente a crece den moda y como un manera di conta storia, cultura y sostenibilidad, y eventualmente den Cashaca.”

Nos tur den bida ta encontra cu obstaculo, limitacionnan of dificultadnan cu nos mester surpasa pa por sigui padilanti, y Quiana no tabata un excepcion. El a conta cu “manera hopi persona creativo, duda propio tabata un di e desafionan mas grandi cu mi a enfrenta despues di gradua y drenta e mundo real, specialmente ora di converti un pasion den un profesion. Limitacionnan financiero tabata hopi real. Mi mester a acepta un trabao full-time y traha cualkier trabao cu por cubri e gastonan, spaar na banda mientras mi tabata inverti den mi vision. Despues di trabao, mi a pasa un gran cantidad di anochi laat ta crea e fundeshi di Cashaca. E tabata agotador, y tabatin hopi momento di dificultad.”

El a agrega cu mientras e tabata crece, e presion tabata aumenta e sentimento cu esaki “mester funciona, di otro manera mi lo ta pega den un trabao cu no ta alinea completamente cu ken mi ta. I mi ta kere berdaderamente cu persigui un carera creativo ta rekeri bay all-in; compromete completamente mientras bo ta compronde cu progreso ta poco poco y cu sacrificionan real di tempo, placa y energia ta inevitable. Te hasta awo, ainda mi ta siñando con pa balansa mi trabao full-time, e trabao di mi marca Cashaca, famia, amistadnan y tempo pa mi mes.”

Sinembargo, Quiana tambe a comparti e parti positivo di esaki, contando nos cu cada desafio a reforsa e importancia di confiansa, “confiansa den mi mes, den e proceso y den e storianan cu mi kier ra conta. Hopi biaha mi ta corda mi mes, ‘sopi pura ta sali salo.’ Un fundeshi fuerte ta tuma tempo y ta e elemento clave pa haci esaki funciona. Despues di 5 aña ta construi e marca aki, mira tur cos bin den otro na Aruba Fashion Week tabata sumamente emocional. E audiencia tabata emociona y inspira pa e coleccion cual tabata pa mi un gran exito. E reconocimento cu mi a ricibi aya a bin via un proceso oficial lidera pa Albania Rosario, banda di un comite distingui como parti di FDLA su Emerging Talent Support Program. E momento aki a nifica mas cu un validacion personal; el a sinti como un prueba cu tur loke mi a imagina finalmente ta birando realidad. Representando Aruba riba un escenario internacional y contribuyendo na con e isla ta mira mas aleu di su lamanan, como un luga di creatividad, moda y un cultura cu ta pensa padilanti ta algo di cual mi ta increiblemente orguyoso. Mi ta profundamente gradici na tur esnan cu a kere den mi vision for di comienso. Sin mi famia y amistadnan cu a sostene mi, mi no lo a logra yega asina leu.”

Den e proximo edicionnan, nos lo sigui comparti e storia di Quiana, uno yen di resiliencia, dedicacion y perseverancia, cu confiansa den su mes y un amor profundo pa su isla.

Potretnan saca pa Esteban Buitragobph y Team Informa Models na Aruba Fashion Week