(AP)—Ta posibel cu bo ta mira rutinanan elabora di baña riba red social: exfoliacion tur dia, dobel limpieza, habon antibacterial, hopi scrub di curpa cu holonan dushi y azeta pa baña.
“Mi ta un tiki disgusta pa e rutina di baña,” Dr. Olga Bunimovich a bisa, un dermatologo cu ta duna les na Universidad di Pittsburgh.
E proceso di hopi paso cu ta inspira hende pa pasa un eternidad ta poniendo habon por trece daño na bo cuero — y tambe na e miedo ambiente. Segun dermatologonan, e cosnan ey casi nunca ta necesario.
“Bo cuero ta un barera,” Dr. Nicole Negbenebor di University of Iowa Health Care a bisa. “E ta un di e bareranan mas grandi cu bo tin. E ta bo manera natural di defende bo mes. Pues nos mester trat’e cu cuido, pero tin biaha algo bon por bira demasiado.”
Aki ta kico bo mester sa tocante un baña basico y señalnan cu ta indica cu bo a pasa e limite den bo rutina.
Cosnan basico ora ta baña
Un baña ta un rutina relativamente simple cu normalmente no mester di 10 paso ni hopi producto. Un baña diario cu awa lauw y un limpiador hipoalergenico sin holo — sigui pa lotion o azeta pa hidrata — ta suficiente.
No keda hopi tempo bou di awa ni pone e temperatura hopi halto — e por kita e azeta natural for di bo cuero cu ta protege esaki, y laga bo cuero vulnerabel pa secura y iritacion.
Pa loke ta habon, usa un habon pa cuero sensitivo. Habon antibacterial ta popular, pero expertonan ta bisa cu e habon aki ta seca bo cuero demasiado pa uso diario (e por sirbi pa hende cu tin un condicion di cuero yama hidradenitis suppurativa, cual ta causa cystnan doloroso riba e cuero).
Azetanan por ta bon pa bo cuero ora bo ta muha ainda y a caba baña, segun Negbenebor. Pero ta importante pa compronde cu azeta no ta un hidratante, sino un seyador. Awa ta hidrata bo cuero, y e azeta ta seya e humedad aden.
“Ta agradabel pa tende rutinanan di cuido di cuero cu ta inclui limpieza y tambe hidratacion,” segun Dr. Lisa Akintilo di NYU Langone Health, “pasobra ta falta esaki den hopi rutina di cuido di cuero.”
“Double cleansing” no ta necesario
Tin influencer cu ta propone cu sin exfoliacion y “double cleansing”, bo rutina no ta completo.
Esaki normalmente ta ser usa pa cuido di cara, specialmente ora bo ta usa makiyahe: prome ta aplica un limpiador basa riba azeta pa kita makiyahe y exceso di azeta, y despues un limpiador basa riba awa pa kita e resto.
Pero expertonan ta bisa cu no tin necesidad pa aplica e practica ey riba henter bo curpa.
“Mi no ta pensa cu nos mester haci dobel limpieza di nos cuero… hende ta usa habon demasiado,” Bunimovich a bisa. “Bo no mester habon riba henter bo cuero, punto.” En bes di esey, el a agrega, laba bo partinan intimo y e partinan di bo curpa unda bo cuero ta dobla.
Un otro cos cu por seca bo cuero ta habon antibacterial. Tin hopi afirmacion cu e habon ey ta esencial pa rutina di curpa, pero expertonan ta bisa cu e habon ey hopi biaha tin mesun ingredientenan cu habon normal y ta seca demasiado. Sinembargo, e por sirbi pa hende cu tin hidradenitis suppurativa.
Exfoliacion ta bon, pero no demasiado
Exfoliacion ta pa kita celulanan morto riba bo cuero, y ta beneficioso, segun expertonan. Pero si bo ta hacie tur dia, e por causa hopi problema, specialmente si bo tin cuero seco of condicion manera eczema of acne.
Exfoliacion manual — manera cu scrub of un ‘loofah’— mester hacie cu moderacion pa evita iritacion. Si bo ta mira rash despues di exfoliacion, e ta un señal cu bo ta haciendo demasiado.
Un manera mas suave ta uso di productonan cu acido lactico of glycolico, pero no constantemente, segun dermatologonan.
Spaar awa, haci bo baña mas cortico
Bañamento ta representa casi 17% di uso di awa entre hogarnan na Merca, segun e Environmental Protection Agency.
Varios estado cu ta sufri di secura modera of severo a pidi pueblo pa conserva awa — incluso tuma baña mas cortico.
Si bo kier limpia y warda bo azeta natural, un baña cu awa lauw cu ta duna bo basta tempo pa limpia bo curpa ta suficiente den mayoria caso.
