Inicio di e siman aki, Bon Dia Aruba a publica un articulo tocante un ciudadano cu a haya un cacho den hopi mal estado na un tereno na Catiri. Dialuna, e persona aki, N.M. a bay busca e cacho pa dun’e ayudo, pero no a logra haya esaki na e lugar mas, y a nota cu e doño a laga haci e tereno limpi.

Bon Dia Aruba a tuma contacto cu N.M. pa puntra con a para cu e cacho aki, cu a hala hopi atencion den comunidad. N.M. a bisa cu finalmente a logra haya e cacho. “E cacho a wordo haya, el a bay veterinario y ta hayando su tratamento necesario,” N.M. a confirma.

Mientras cu e cacho aki tabata asina afortuna di keda rescata y ricibi e atencion veterinario necesario, e situacion di hopi animal na Aruba ta sumamente precario.

Den ultimo simannan so, tin un cantidad enorme di caso di maltrato y abandono cu a keda reporta na Aruba, sin conta e cantidad di cacho cu ta ser laga riba caya pa nan cuenta den solo, calor, purga y carpata, sin awa ni cuminda, y den peliger di bira victima di trafico of di persona cu mal intencion.

“Bait Dog”
 Un caso hopi tristo ta un cacho di caya, Blanquita, cu ta sterilisa y tin microchip. Un señora tabata cuida e cacho aki cu hopi amor, mientras e tabata purba di yega na un manera pa pone muraya rond di su cas pa tuma e cacho aden. E señora a cuida e cacho durante dos luna, hunto cu otro dos cacho macho.

Sinembargo, awo e cacho aki diripiente a desaparece. Tin hende ta sugeri cu e cacho aki a ser tuma como “bait dog” pa hende cu ta organisa pelea di cacho, pasobra e cacho aki ta hopi lief, y e “bait dog” mester ta un cacho manso.

E fenomeno di “bait dog” ta bon conoci entre e rescatistanan, y ta un di e motibonan cu hopi biaha cachonan, cu eigenlijk tin doño pero ta biba riba caya, ta desaparece diripiente. Esaki pasobra, maske ta un practica ilegal, na Aruba tin hende ta organisa pelea di cacho. Y den e mundo baho aki di maltrato animal, ta haci uso di cachonan manso y lief como “bait” pa e cachonan brabo “train” nan bringamento riba nan. E pober animalitonan aki ta sufri exageradamente y no por defende nan mes. Nan no ta ricibi atencion medico tampoco, y ta muri un morto hopi cruel.

Mas tristo ainda ta cu mientras e señora tabata busca Blanquita, el a core rond na Sero Preto, y ta asina con el a bin topa un otro caso di cacho den haula na Sero Patrishi, cual tambe Bon Dia Aruba a reporta den nos edicion di dialuna.

Den e caso aki, na un cas a bin haya un cantidad di cacho, tur na cadena of den haula, algun di nan mara den solo. Nan tabata den mal condicion, hopi flaco cu carpata y purga. Ademas tabatin haula cu un cantidad di galiña.

E haulanan a hala atencion di boluntarionan di rescate animal, pa motibo di e cantidad di cacho y puppies den haula. Den e caso aki, a papia cu e doño di e tereno y e cachonan, kende no tabata mustra di compronde mucho bon kico e problema ta. Un persona a informa e rescatista cu un cacho a muri caba na e sitio.
Boluntarionan sinembargo a tuma accion y a purba trece cuminda, awa limpi, y a logra bay cu tres di e cachonan, cu tabata den haula, for di e lugar, entre nan un puppy bruin masha flaco mes.

Segun informacion cu Bon Dia Aruba a ricibi, tin preocupacion cu e cachonan den e haula aki ta relaciona cu e pelea di cacho.

Negligencia
 Entre tanto caso di maltrato, e factor di negligencia ta esun mas comun. Esaki kiermen ora hende no ta necesariamente dal e cacho of activamente abusa di dje, pero ta pone e animal den condicionnan deplorable y no ta tuma accion pa dun’e e cuido na cual e cacho tin derecho. Por ehemplo, ta laga cacho cera den haula, mara na cadena, den solo, sin awa, sin cuminda, bao awasero, cu carpata, purga, sarna, cu malesa sin haya atencion di veterinario, sin haya amor di cas, ni hunga, ni nada.

Esaki ta un maltrato hopi severo cu tin consecuencianan devastador pa cacho, y cu hopi biaha, e persona cu tabata supposed di atende e cacho, no ta ripara cu ta participando den un crueldad asina teribel.

Educacion y conscientisacion ta urgente, pero tambe ta necesario pa autoridadnan implementa control, boet y castigo.
Mientras tanto, boluntario y fundacion ta traha di curason cu recursonan hopi limita. Ciudadanonan consciente cu kier colabora, por yuda door di boluntaria algun ora di nan tempo, of haci un donacion. Cualkier cantidad ta yuda e fundacionnan cubri e gasto di veterinario, cuminda, y remedi pa e animalitonan den necesidad.

Bon Dia Aruba a tuma contacto cu vocero di polis, Liliana Rasmijn, pa puntra tocante e casonan aki. A puntra si polis tabata na altura di e caso. Tambe a puntra kico por haci ora haya cacho den mal estado y e doño no kier coopera, of si haya un cacho of otro animal laga atras den un caso bandona, ki procedura tin pa atende esaki?

Te ciere di e edicion aki, no a ricibi un contesta.