Biblionef Hulanda a manda nos un coleccion di buki pa mucha. Na Aruba Sra. Carla van Eerden, representante di Biblionef Aruba hunto cu su colega, sra. Sandra Postma a entrega basta caha cu buki na sra. Michelle Roos, hefe di Dept. Catalogo kende a ricibi esakinan cu man habri y un sonrisa riba su cara.
Biblioteca a haya buki pa mucha di tur edad, bukinan cu storia y bukinan informativo cu ta duna informacion riba diferente topico. Sigur sigur un bunita coleccion cu biblioteca por fia su miembronan. Biblioteca ta gradici Biblionef pa e cooperacion.
Biblionef ta un instancia cu ta traha rond mundo pa stimula lesamento y laga tur mucha conoce e goso di lesamento. Biblionef ta focus riba mucha cu no tin aceso facil na buki. Biblionef semper a traha hunto cu Biblioteca Nacional Aruba. Pa medio di e Mediateca escolar scolnan por haya coleccionnan di buki pa fia. Biblionef Aruba ta parti bukinan na scolnan na Aruba ya for di aña 2000.
Biblioteca publico ta introduci miembrecia gratis pa tur mucha y hoben bou 18 aña y ta invita bo bay biblioteca cu bo yiu, sobrina, primo y haci nan miembro di biblioteca! Pakico? Pa tur mucha y hoben por explora un coleccion grandi di storia y buki riba tur topico of lesa revista. Banda di e coleccion na biblioteca, biblioteca ta ofrece tambe un coleccion di buki Ebooks y Audiobooks. Tin hopi espacio pa traha riba computer, busca informacion riba Internet y ademas tin WIFI pa por usa bo Smartphone, tablet y laptop.
Mucha y hoben ta bon bini pa traha riba tarea di scol sea individual of den grupo. Pa registra como miembro por fabor trece un ID valido.
