(AP) – Un studiante di Indonesia ta sospecha den siman pasa su atake di bom riba moskee a construi dispositivonan explosivo chikito na cas y kier a copia extremistanan cu el a haya online pero no tabatin conexion cu ningun red di militante, segun autoridadnan a informa diamars.
E investigadornan di polis a describi e hoben, ken tabata entre e 96 herida den diabierna su atake na Jakarta, como un persona obsesiona cu contenido violento y extremo. E studiante, nken no ta identifica, ta bao recuperacion na un hospital despues di 2 operacion.
“E mucha homber aki tabata motiva pa lansa e tipo di accion aki,” Director di Jakarta Police Iman Imanuddin a bisa na un conferencia di prensa. “El a sinti su so y no tabatin cmaindap a expresa su kehonan, no na su famia, comunidad ni na scol.”
E studiante a construi 7 bom – 4 di nan detona – usando material hopi simple, incluyendo bateria 6 voltahe, jerry can di plastic, control remote y clabo skerpi cu intencion di causa daño, Henik Maryanto di polis su unidad di brigada mobil a comenta. “Nos a sigura e bomnan activo cu ta restante cu no a logra explota,” Maryanto a bisa, agregando cu e sospechoso a pone nan hunto nan so pa medio di sigui instruccion for di internet.
Polis tambe a recupera un arma di wega cu ta pertenece na e sospechoso y inscribi cu loke ta aparenta di ta lema di supremacistanan blanco y e nomber di extremistanan internacional, incluyendo neo-Nazi condena di atakenan mortal na Canada y Italia, un atacador di moskee na New Zealand ademas di un tirador di scol na Columbine High.
“E simbolonan aki y nombernan ta figuranan violento y un ideologia cu a inspira e hoben pa copia nan, pero no tin conexion entre e sospechoso y ningun red terorista,” Mayndra Eka Wardhana, vocero di e ekipo contra terorismo a bisa.
