Den e ultimo simannan, e historia di lucha, speransa y solidaridad a uni famia, amigo y comunidad rond di Alexander Flores. E caso di Alexander ta uno cu a shock comunidad completo ora cu el a ser haya inconsciente den e van di e crèche cu e tabata bishita, despues di keda den e van cera pa cinco ora. E ultimo update ta uno cu ta yena su famia y comunidad di Aruba cu alegria y speransa: Alexander a sali di ICU.

Alexander a ser manda cu maximo urgencia pa Colombia cu air ambulance pa motibo cu su situacion tabata grave. Pero loke a cuminsa como un situacion critico marca pa momentonan di angustia, awor a bira un situacion cu ta ser marca pa fe profundo y milagernan chikito cu ta duna speransa.

E prome dianan despues cu Alexander a yega Colombia e tabata den ICU, luchando pa su bida. Dokternan a haci diferente test, incluyendo MRI, pa compronde miho su condicion. Na un momento, resultado di un di e MRI-nan tabata un tiki mas favorable, loke a permiti e ekipo medico purba kita e tubo di hala rosea pa duna su curpa un chens pa hala rosea riba su mes. Sinembargo, e siguiente dia a keda cla cu su pulmonnan ainda no tabata suficientemente fuerte. E tubo a mester ser poni back.

E siguiente dianan, su pulmonnan a mustra poco mehoracion, aunke ainda tabata fragil, y a ripara tambe cu su curpa tabata retene likido, pero danki na remedi y cuido intensivo, esaki a logra ser controla.

Alexander su recuperacion na un punto a encontra un complicacion na momento cu algun di su organonan cu inicialmente no tabata mustra daño a cuminsa debilita, y su temperatura a subi varios biaha. Dokternan a sigui haci test y cambia tratamentonan pa trata di combati e complicacionnan.

Despues di varios dia di incertidumbre, algo extraordinario a pasa. Alex, cu a pasa mas cu un siman y mei sin reaccion, finalmente a habri su wowonan. E prome cos cu el a mira tabata su mama y su tata. Un gesto chikito, pero cu un impacto inmenso.

Asina poco poco, Alex a cuminsa move su dede, su pia y despues su mannan. Dokternan, yena di speransa, a purba kita e tubo di respiracion un biaha mas pa duna Alex un otro chance pa hala rosea riba su mes, y a logra.

Desde e momento ey, e ekipo medico a cuminsa cu diferente test pa evalua su cerebro, su funcion cognitivo, motorico y desaroyo, mientras nan ta sigui monitorea tur su organonan. E siguiente paso lo ta rehabilitacion pa yuda Alex recupera poco a poco.

Exactamente dos siman despues di yega Colombia, un otro logro grandi a yega: Alex a sali for di ICU y a move pa un camber normal. Un logro cu ta yena no solamente e famia alegria y speransa, pero comunidad di Aruba completo cu tabata pendiente di Alexander.

Alexander su lucha ainda no a termina, pero cada paso chikito ta un victoria grandi. Y pa su famia, e meta principal ta pa Alex recupera, pa bolbe cas completamente recupera.