Redaccion di Bon Dia Aruba a logra papia cu un persona, cu ta desea di mantene anonimato, pero cu ta bon na altura di e situacion interno di hospital y di e laboratorio, cu a duna nos algun detaye di e caso, describiendo e magnitud di e asunto.

Segun e informante, ta trata di un scam, unda tabata pretende cu e testnan pa detecta cancer di boca di matriz, e asina yama PAP-testnan, lo tabata bay Hulanda pa analisis, loke riba su mes caba ta innecesario, pasobra e testnan semper tabata ser haci na Aruba mes, pa e suma di Afl 15 pa cada test. Desde aña pasa rond di luna di september a yega na un areglo cu e testnan mester a bay Hulanda pa analisis, loke a cuminsa costa nos e bunita suma di 190 euro (Afl. 383,-) pa cada un… Ta calcula cu e cantidad di test cu supuestamente a bay Hulanda ta core den mas di 2.000, posiblemente hasta 2.500.

Por lo tanto, ta probabel cu tabatin un suma total envolvi di casi miyon florin na gasto, den menos di un aña, y como agravante e hecho cu probablemente tur e testnan a ser haci na Aruba mes, unda nan lo a costa ni Afl. 50.000. Ta di spera cu pronto gerencia di Hospital duna un debido splicacion na comunidad con e tipo di caso aki por a tuma luga, y pa cuminsa contesta e pregunta pakico a bira asina urgente pa manda test Hulanda, cu tin añanan ta ser haci pa un fraccion di loke tabata cobra pa manda e testnan exterior. Y si tin base pa cana caminda penal, pa haci esaki sin vacilacion.

 

LEAVE A REPLY

Please enter your comment!
Please enter your name here