(AFP) – Un persona a muri na bario Upper East Side di New York, na Merca, despues di keda infecta cu malesa Legionnaires, segun oficialnan di salud a bisa den un declaracion durante weekend.
Departamento di Salud di New York tambe a bisa cu 67 caso a keda confirma den e bario, y cu 12 persona a keda hospitalisa.
Malesa di Legionnaires ta un infeccion serio di pulmon causa pa bacteria Legionella, cu un tasa di mortalidad di nuebe porciento.
Hende por bira infecta mediante awa contamina of door di inhala micro-droplet den aire. E malesa no ta transmiti di persona pa persona.
Departamento di Salud di ciudad di New York a urgi cualkier persona experenciando sintomanan manera griep – manera kentura, calafriu, dolor di musculo of tosamento – pa busca atencion medico.
Adicionalmente, oficialnan a duna ordo pa al menos 76 edificio – incluyendo esun unda e famoso Museo Metropolitano di Arte ta ubica – pa haci un limpiesa special, despues cu muestra di awa a test positivo pa e bacteria.
E malesa tin su nomber pa e prome brote conoci, cu a sucede na 1976 na e hotel na Philadelphia unda e organisacion di veterano di Legion Mericano tabatin un convencion. 34 persona a muri e tempo ey.
