(AFP) – Un muher jong a fayece na Brazil despues cu a lans’e for di un brug pa un bulamento cu cabuya, pero sin e cabuya di seguridad, segun polis a bisa diadomingo.
Den video di e accidente diasabra circulando online, dos homber ta hisa e hoben di 21 aña di edad riba nan cabes y ta tir’e for di Skeleton Bridge, den interior di estado Sao Paulo, mientras esnan mirando ta ripara cu no tin mecanismo di seguridad mara, y ta grita, “Guys, e cabuya!”
“No a sigura e ekipo di seguridad adecuadamente na momento di e bulamento. E victima no a sobrevivi e caida,” polis a bisa den un declaracion na AFP.
A aresta tres homber pa “homicidio cu dolus eventualis” – loke ta nifica cu nan tabata na haltura di e riesgo di morto, pero a hacie toch.
“Investigacion ta andando pa determina e circunstancia y establece responsabilidad,” polis a bisa.
Medionan local a identifica e victima como Maria Eduarda Rodrigues de Freitas, y a bisa cu el a cay como 40 meter na su morto.
Tiki prome cu e accidente, De Freitas a post un imagen di e sitio riba Instagram, bisando: “Ken ta e persona loco cu a laga mi bin bula for di un brug???”
Videonan anterior di e deporte extremo na e brug, ehecuta pa compania Entre Cordas, ta mustra participantenan cu un cabuya diki di seguridad rond di nan cintura prome cu ta lansa nan.
Bulamento cu cabuya ta diferente di bungee jumping pasobra e ta usa un cabuya menos elastico, loke ta nifica cu e participantenan ta swing bay bin en bes di bounce na final di e bulamento.
Dan Osman, un Mericano considera inventor di e deporte, a muri mientras tabata bula cu cabuya na 1998 cu 35 aña di edad.
