Dentro di algun luna gobierno di presidente Trump a logra en todo caso algo cu el a priminti: kibra e orden existente di trato entre pais a base di regla acepta pa tur. Loke e ta pretende di crea na su lugar no ta necesariamente loke mayoria di nos lo kier mira. Di tur manera e actual problemanan no ta caba cu un eventual areglo di e guera economico entre e paisnan mas prominente di mundo. Loke a desaparece tambe ta e base minimo di confianza cu mester existi pa paisnan por anda cu otro, cu cierto certeza cu loke a conveni ta loke ta respeta.

Aki ta unda presidente Trump a logra crea e imagen di su gobierno cu nada cu nan papia o hasta pone riba papel tin un valor te e proximo marduga, unda e lider ilustre di e pais spierta cu otro pensamento y no ta perde tempo pa comparti esey cu mundo. Hasta tratado cu e mes den su promer presidencia a conveni y firma, awor ta ser poni un banda sin ningun consideracion pa e confianza cu e otro partnernan mester tin cu nan acuerdo na e nivel aki, di tratado entre nacion, ta un obligacion sagrado pa tur envolvi. Esaki ta djis un ehemplo banda di hopi otro, manera renuncia na e tratado di Paris encuanto cambio di clima y esfuerzo pa limita efecto di calentamento di tera; falta di respet total pa soberania di otro pais, hasta di aliadonan den e pacto Norantlantico di defensa comun (NATO). Lo no ta nada straño cu, banda di salida for di Organizacion Mundial di Salud (WHO), si Estadonan Uni bao di e gobierno aki renuncia membrecia di por ehemplo Organizacion Mundial di Comercio (WTO), sigur si e organismo yega na veredicto cu gobierno di Trump no gusta. Tanto China como Union Europeo a anuncia cu den e guera comercial actual nan ta considera denuncia Merca na WTO.

Naturalmente cu e tendencia negativo aki di un actitud cada vez mas desafiante di gobierno Mericano por cambia di rumbo. Esey ta depende grandemente di e oposicion cu e topa na su propio pais. Hasta por sucede cu por bin un cambio di gobierno na dado momento, cu ta coregi e rumbo negativo aki. Pero ta imposible pa kita e realidad di un retorno na poder, cada cuatro aña, di un regimen similar cu ta bolbe pone mundo sacudi riba su fundeshi. Esaki ta mas cu probable tambe pasobra e raiz di e confrontacion actual no ta solamente e surgimento di un presidente maluco, cu por cambia di opinion di nochi pa mainta, sino e accion di e podernan politico y economico na Merca, cu ta mira e decadencia di e dominio economico y politico-militar di nan nacion riba escenario mundial. Trump y su aliadonan ta reconoce tambe un mundo cu no conoce y reconoce Merca como e lider indisputable di mundo. Nan tesis ta e reparticion di mundo entre e actornan grandi, unda cada ken ta responsable pa nan propio region di influencia.

Tur esaki tin consecuencia pa nos pais, riba su mes y como parti di Reino Hulandes. E falta di respet pa acuerdo entre pais di banda Mericano te awor no a toca nos ainda, pero e incertidumbre ta cu esey por cambia di un momento pa otro, hustamente pasobra e nacion Estadonan Uni ya no ta un partner confiable mas. Nos tin por ehemplo acuerdo encuanto di e operacion di Aduana y Migracion Mericano na nos isla, un facilidad cu ta di importancia grandi pa nos turismo. Ohala cu nada cambia den e sentido aki, pero nos ta prepara pa e consecuencianan si e decision cay cu ta kita e facilidadnan aki?

Di otro banda, Reino Hulandes tin, desde 1956, un tratado cu Estadonan Uni, yama e Friendship Treaty, cu ta brinda mutuamente cierto facilidad di estadia y di establece negoshi na e otro teritorio, cu en principio mester ta igual na loke ta ofrece na e propio ciudadano y e propio empresa. Den tur e turbulencia actual ta imaginable cu gobierno Mericano ta nenga di asumi su responsabilidad pa ehecucion leal di e tratado aki. Kico lo ta e consecuencia?

Otro aspecto importante ta e tendencia mundial di perdida di influencia di e moneda Mericano. E intentonan actual di gobierno Mericano pa mantene e hegemonia di su moneda den comercio mundial por resulta hustamente den mas intento di hiba comercio y facilita pago fuera di e sistema basa riba dollar Mericano. Hasta por mira esaki como un di e consecuencianan di Trump su gobierno pa busca problema cu henter mundo pareu, stimulando asina e creacion di lazo comercial sin envolvimento Mericano, tampoco den pago comercial. Aruba tin un moneda propio cu ta mara na e dollar Mericano y nos no ta pretende ni predeci cu a corto plazo lo tin cambio den esaki, pero ta importante no perde di vista cu nos dependencia di dollar por perhudica nos seriamente, si e moneda aki cuminza perde valor contra otro moneda fuerte, a base di e debe enorme Mericano, unda den e actual guera paisnan manera Hapon y China por cuminza deshaci di nan portafolio triyonario di bono di gobierno Mericano. Tanten nos ta haci comercio cu Merca, no tin cambio, pero si nos kier diversifica lazo comercial, esaki por bira un problema grandi. Mas cu tur cos, pasobra por lo pronto nos mester atende asunto cu un estado cu posiblemente no ta reconoce ni acuerdo ni foro di arbitrahe mas. No lo tin anto ni confianza ni confiabilidad mas…