Segun resumen diario di Departamento di Salubridad Publico DVG, ayera tabatin e lamentable noticia cu Aruba ta conoce un morto mas pa Covid-19. Cu esaki e cantidad total di fayecido entre residentenan ta yega na 111.

Segun resumen di DVG ayera, 31 persona a recupera di e malesa mientras cu a registra 42 caso nobo di Covid-19 na Aruba. Di esakinan, tres ta turista y 39 ta residente. E cifranan aki ta representa un tasa di positividad entre nos residentenan di 29 porciento. Ademas, e cantidad di caso activo ayera tabata 489. Casonan di Covid ta aumentando continuamente y lo surpasa e marca di 500 caso activo den e dianan aki. Esaki ta e di cuatro peak mas halto den henter e pandemia, y ta acercando e ultimo peak cu tabata dia 27 di maart 2021, unda a yega na 677 caso activo, pa despues baha na e nivel hopi abao di ultimo lunanan, cu a permiti e flexibilisacion di ultimo tempo, unda practicamente tur limitacion a ser kita, y a keda solamente algun recomendacion pa loke ta distanciamento social y uso di tapaboca.

Dia 02 di augustus e cifra di caso activo tabata na 489 caso. Como referencia por observa den e grafico di Worldometers cu tres siman pasa, dia 12 di juli, e nivel di caso activo tabata na 33 caso, un aumento di 1381% compara cu ayera.

Segun DVG, e datonan ta keda ilustra un aumento continuo di casonan nobo, cu un averahe semanal di 57 caso pa dia, y un averahe semanal di tasa di positividad di 26 porciento pa dia.

Mientras tanto, tin 17 persona interna den Hospital Dr. Horacio Oduber. Di esakinan, cuatro ta den Unidad di Cuido Intensivo mientras cu tin 13 persona interna riba piso general.

Sinembargo, den comunidad no por nota un actitud cauteloso pa cu e virus SARS-CoV-2. Como cu tur entidad o edificio pa dicidi pa nan mes si tin uso obligatorio di tapaboca y mantene distanciamento social, na e altura aki no tin tanto lugar mas cu ta mantene e obligacion di uso di tapaboca y distanciamento social.

Riba website oficial, arubacovid19.org, e ultimo decisionnan di gobierno, publica dia 9 di juni ultimo, ta indica cu uso di tapaboca no ta obligatorio pero si recomendabel si no por mantene distancia di 1.5 meter, y ta indica cu establecimento por exigi uso di tapaboca.

E otro decision di gobierno publica riba dia 9 di juni tabata encera cu personanan vacuna no mester bay den cuarentena. No a actualisa e recomendacion aki a pesar di informacion, cu DVG mes a comparti, indicando cu hende vacuna tambe por ta portador di e virus y por contagia otronan, of bira malo nan mes.

E pregunta, cu no a haya contesta ainda, ta na ki nivel di caso activo autoridadnan  lo bin den accion pa para e desaroyo negativo di e momento aki. Naturalmente e parti di e poblacion cu ta vacuna ta yuda pa contene e propagacion di e virus, y e situacion na hospital no ta motibo pa gran preocupacion ainda, al menos no pa loke por observa te na e momento aki.

E tendencia global pa maneho di pandemia no ta encera tanto lockdown y restriccion manera aña pasa. Cu introduccion di e vacuna, mas y mas paisnan ta pasando e responsabilidad di nan salud na cada ciudadano, pa asina duna espacio pa recuperacion economico. Sinembargo, cu e propagacion di variantenan, particularmente esun delta cu awendia ta esun mas prevalente y contagioso, ta cuestiona si gobiernonan mester retoma e maneho di pandemia y reintroduci restriccion.