Capacidad y esfuerso pa supera su mes den campo aki ta haci cu tur dia e diseñador creador di su mesun marca Daniela Thielen ta crea pañanan unico unda recientemente el a registra pa un challenge na Mexico y di miles di participante el a gana e prome luga.

Den un entrevista special cu Bon Dia Aruba, Daniela Thielen di nacionalidad Venezolano naci na Coro y bibando na Aruba for di varios aña a conta cu el a cuminsa den esaki ora e tabata un hoben di 17 aña cosiendo badpak y awor e ta conoci como diseñador di shimisnan y pañanan di alta costura.

Tambe el a manifesta cu den e tempo ey e tabata studia Medicina y aunke esey tabata rekeri hopi esfuerso e tabata combina su pasion di cose pañanan y badpak cu su studio na universidad.

“Mi tabata un mucha ainda pero mi tabata soña na grandi unda mi prome coleccion segun loke mi ta corda tabata di blusanan y esun di dos tabata di lingerie” Thielen a bisa. Den su ciudad natal Coro a presenta diferente shows unda el a participa como por ehempel na The Models Project, Top Models Fashion Show, Medano Tv y Fashion Show di academia Marie Claire cu actualmente ta presentado den canal Televisa y Univision na Merca.

Recientemente, Thielen a gana un challenge denomina “Haute Couture for Peace” cual a wordo organisa pa e diseñador Ucraniano cu ta biba na Mexico di nomber Katerina Olek. Thielen a indica cu Olek ta su mas grandi inspiracion e cual a bin creando un serie di programanan y actividadnan na fabor di paz na mundo, principalmente na su pais cu tin mas di seis luna den guera cu Rusia.

E proyecto aki tabata consisti di crea un shimis di alta costura cu por a refleha e paz na mundo caminda Thielen a realisa un shimis cu tabatin diferente concepto den cada parti di dje. Thielen a participa den challenge aki hunto cu 3.330 participante rond di mundo unda cu el a gana e prome luga cu su creatividad, “aunke competi no tabata mi obhetivo principal mi a conta cu apoyo y votonan di hopi hende unda paz ta ekilibrio y stabilidad”, el a bisa.

Di e shimis cu el a crea, den cual tabatin e concepto di ‘puresa’ inspira den e flor Cala, el a sigura cu “mi a laga mi curason, mi ideanan, anochinan sin drumi, mi pensamentonan den cual cada parti di e shimis tin un motibo y a wordo crea specialmente pa bo, pa bo compronde cu nos por tin un mundo miho y cu nos por cuminsa cultiva paz den nos bidanan”, el a expresa.

Como diseñador el a haya pedido di su clientenan unda e no tin un modelo cla of un manera con pa cuminsa cose, e ta cuminsa y e ta caba cu su idea, “den esaki mi ta supera mi mes cu algun biaha mi ta kere cu a mi no por pero e realidad ta cu semper mi por”. E ta considera su mes como un persona responsabel cu ta entrega na tempo y cu ta cuestion di pone e balans entre loke e ta gusta haci y loke mester haci na e momento ey, “ta miho pa keda bon cu un cliente so cu keda mal cu tur”, el a sigura.

Cu 27 aña Thielen den su tempo liber ta gusta comparti cu su famia y cu su yiu muhe, tambe e ta dedica tempo den su studionan cu Katerina Olek di cual aworaki e ta bay cuminsa un otro opleiding.

Pa finalisa, Thielen a dedica palabranan na nos lectornan unda el a manifesta cu “mi ta kere firmemente cu nos soñonan por wordo cumpli, semper y cuando bo tin e boluntad di traha pa nan, sin give up pasobra e caminda por bira dificil, mi ta kere cu e tempo di Dios si ta yega pa nos cu a warda pe y nos a transforma nos mes den espera aki, igualmente mi ta kere cu e decisionnan cu nos ta tuma y den nos tin rond di nos ta depende nos futuro”, Thielen a declara.

 

 

 

LEAVE A REPLY

Please enter your comment!
Please enter your name here