Diamars 28 di october 2025 Biblioteca Nacional Aruba lo ta e escenario di un evento special titula “Un Siglo di Recuerdo”, dedica na memoria di Digna Lacle-Herrera (d.f.m.), figura prominente den historia cultural, literario y educativo di Aruba.

E actividad, cu ta un homenahe na su centenario (1925–2025) y lo reuni hendenan di cultura, arte y educacion pa celebra e legado rico di Lacle-Herrera, cu tabata conoci como maestra, poeta, autora, compositora, politico y pionera social. Durante su bida, Digna a traha incansablemente pa promove e derecho di hende muhe y di mucha, y su amor pa idioma Papiamento a marca tur e obra cu a laga atras.

Den colaboracion cu Astrid Britten, Departamento di Cultura Aruba y Mirto Lacle, Biblioteca Nacional lo presenta un programa multidisciplinario cu ta integra literatura, arte, educacion y musica. E evento lo inclui declamacion, presentacion di documental, charla cultural y canto, tur cos den ambiente inspira pa e obra di Digna Laclé-Herrera.

Sr. Sergio Tjie-A-Loi, lo duna un splicacion y presenta un fragmento di un documental titula “Despuès di bo”, produci pa René Maduro. Ademas, Mirto Laclé lo guia un recorrido emotivo pa repasa e herencia y legado literario di Digna, abarcando su poesia, prosa y drama.

E parti musical ta den man di Maybelline Arends-Croes, cu banda y ex-miembronan di grupo Tutti Frutti, incluyendo cantantenan Hilyanne Croes, Mandy Villasmi y Kiziah Trimon. Nan lo interpreta un seleccion di cancion cu Digna Laclé-Herrera a compone hunto cu Maybelline, entre otro tema inspira.

E pianista Johnny Scharbaay y su banda lo duna su aporte musical durante anochi, entreteniendo e publico y compañando e cantantenan na escenario.

Tjie-A-Loi a expresa durante e conferencia di prensa cu pa su persona tabata un placer di por a graba cu Digna pasobra apart di ta un persona cu un conocemento profundo, hopi biaha despues cu nan no t’ey mas hendenan ta corda di tanto cos cu por a puntra y cu e documental aki e tabatin e oportunidad ey.

“Mi tabata hopi honra, te ainda, di por a combersa, wak parti di su bida, ta na su cas y combersa cune y sa cosnan cu mi no tabata sa. E parti pa cuminsa graba tabata algo special pasobra a graba cune pa cuminsa e programa na lama y e no tabata mobil, pues tabata un trabou grandi pa haya e rolstoel special, pero eynan a cuminsa e storia,” el a indica.

El a splica cu e manera con nan a haci entrevista tabata diferente pasobra y a hacie diferente compara cu entrevistanan normal. “Pa nos tabata importante cu no a entrevistador tabata na palabra, pero e persona cu ta ser entrevista ta na palabra y esey tabata e secreto di e documental pasobra despues cu e persona no t’ey mas por scucha di su mesun palabranan back,” el a agrega.

Pa loke tabata preguntanan cu a haci Tjie-A-Loi a splica cu tabatin diferente preguntanan cu a haci na su persona y difunto Digna a splica detaya con e tabata haci su poesia, diferente parti ora cu e ta skirbi, y e proceso.

Durante e conferencia Sra. Fatima Kelkboom, un sobrina di Digna Lacle-Herrera, a conta un poco di su relacion cu su tanta.

“Mi tabata hopi pega cune e ultimo añanan door cu su casa a fayece y el a keda su so. Mi a bay yud’e, cuid’e, dun’e su cuido y atencion cu e tabatin mester,” el a expresa. El a sigui conta cu despues di tempo su tanta a cuminsa bira un poco mas malo y e ora nan mester a busca hende pa yuda tambe pasobra el a bira grandi y su so no tabata por. semper el a stima nos.

El a splica cu su tanta Digna no tabatin yiu, pero el a sigura cu el a stima tur su sobrinanan mescos cu ta su yiu nan ta, y nan tambe tabata stima nan tanta Digna. “El a stima tur su sobrinanan mescos cu si nos tabata su yiu. Ami tambe semper a stima mi tata. Tur cos cu mi a haci den mi bida mi a conseha cune y esey ta loke cu mi ta disfruta di dje,” el a expresa.

Sra. Fatima a sigura cu su tanta tabata un persona cu a cumpli cu tur su meta y deseonan prome cu el a fayece. “Mi tabata a haci tur cos cu e tabata desea den su bida. El a biaha mundo y mi no ta kere cu el a bay laga un deseo atras. El a bay y cumpli cu tur su deseonan,” el a bisa.

Casa di Sra. Fatima, Sr. Edgar Kelkboom di su banda a conta cu e semper tabata banda di su casa pa yuda ora cu mester di yuda Digna. El a expresa cu Digna tabata un persona cu tabata comparti cu su y musica y semper e tabata compone cancionnan y pidie pa conseho, pa traha musica pa e composicionnan.

El a agrega cu tambe semper e tabata presente na e conciertonan di musica di su scol. “25 aña largo tur fin di aña Digna tabata presente y tabata anima nos pa sigui ya cu nos ta un scol cu ta echt comparti pa cultura di Aruba, y yuda muchanan pa nan no bay den mal caminda. E tabata un persona cu semper a zorg pa esey y yuda nos. Nos a keda masha agradecido te despues di su morto, ainda nos ta agradecido na tur loke nos a siña di dje, un persona hopi inteligente y cu tin e capacidad pa kico cu bay malo e ta drech’e. E no t’ey mas, pero su legado a keda grandi. No pa nos, pero pa henter Aruba,” el a enfatisa.

“Un Siglo di Recuerdo” ta un invitacion pa henter pueblo di Aruba pa celebra y honra un persona cu a dedica su bida na educacion, cultura y idioma Papiamento