UNESCO ta oficialmente reconoce Aruba como Reserva di Biosfera

Recientemente durante e di 38 sesion di e conseho internacional, ken ta coordina e programa “Man and the Biosphere MAB) di UNESCO, Aruba a keda aproba oficialmente como un designacion di Reserva di Biosfera.

E designacion aki ta reconoce cu e isla ta parti di e Red Mundial di Biosfera di UNESCO.

E reserva aki ta cubri henter e isla, cual tin un superficie di alrededor di 19.300 hectar y ta incorpora e Zona Economico Exclusivo di casi 3 miyon di hectar. Reserva di Biosfera di Aruba ta consisti aproximadamente di108.000 habitante.

Despues di un proceso fuerte y inclusivo di construccion cu a involucra institutonan gubernamental, comunidadnan local y sociedadnan civil, cientifico y stakeholdernan den sector priva, asistencia tecnico di Oficina Regional di UNESCO pa Caribe, finalmente Aruba a logra yega e designacion historico aki.

Director y Representante di UNESCO pa e oficina Regional pa Caribe a comenta cu “e concepto di reservanan di biosfera ta particularmente adapta na e realidad di Caribe y di Estadonan Insular Chikito den Desaroyo (SIDS). E teritorionan aki ta demostra con conservacion di biodiversidad, herencia cultural y desaroyo sostenibel por bay man den man. Nos ta spera cu e designacion di Aruba lo inspira otro paisnan den e region pa considera e modelo aki y uni na e Red Mundial di Reservanan di Biosfera.”

Un Reserva di Biosfera ta un area designa cu tin meta di crea un balans entre biodiversidad y conservacion, desaroyo sostenible y investigacion cientifico cu educacion. E areanan designa pa UNESCO lo forma parti di e programa anteriormente menciona, cual a establece den 1971.

Su funcionnan clave ta inclui conservacion, bao di cual ta proteha e ecosistemanan, panorama, especienan y diversidad genetico, mientras tambe ta promove desaroyo social y economico cu ta sostenible pa medio ambiente y ta sostene investigacion, monitoreo, educacion y intercambio di informacion relaciona cu conservacion y desaroyo sostenible.

Mayoria di e biosferanan ta dividi den 3 zona interconecta, un area clave, cual ta estrictamente proteha pa conserva ecosistemanan y especienan, loke ta yama e “buffer zone”, cual ta rondona of ta pega na e area clave y ta usa pa actividadnan manera investigacion, educacion y ecoturismo, y finalmente e area di transicion, cual ta unda comunidadnan ta biba y traha, promoviendo actividadnan economico sostenible.

Ta importante pa tene na cuenta cu e reservanan di biosfera cu tin reconocimento di UNESCO ta keda bao e soberania y hurisdiccion legal di e pais unda nan ta situa. Nan no ta necesariamente parkenan nacional, aunke nan por inclui si areanan protegi.

E red mundial ta yama e World Network of Biosphere Reserves.

E reserva di biosfera di UNESCO ta representa un luga unda ser humano y naturalesa mester coexisti di manera sostenible, mientras ta traha riba conservacion di biodiversidad y ta sostene e comunidadnan local.

Dr. Marck Oduber a pone enfasis riba e importancia historico di e designacion aki, bisando cu esaki ta confirma di manera oficial Aruba su entrada na e red mundial, cual ta conta cu 784 reserva den 142 segun informacion di 2025. “Esaki ta un momento historico pa Aruba y pa region di Caribe,” el a expresa, agregando cu “Aruba lo bira e di tres reserva di biosfera den Caribe Hulandes y Ingles, fortaleciendo e presencia di nos region den e red mundial aki.”

Oduber a menciona cu e designacion aki ta mas cu algo simbolico, sino ta un desgnacion cu ta representa un compromiso a largo plaso pa traha rumbo na un futuro unda naturalesa, cultura, ciencia, economia y comunidad por florece hunto. E designacion aki tambe ta reconoce cu no por maneha tera y lama di manera separa, sino como un sistema cu ta conecta y ta sostene bienestar, economia y e identidad cultural di Aruba. “Pa Aruba, como un Large Ocean State, un lama saludabel ta esencial pa nos siguridad alimentario, economia blauw, turismo y resiliencia contra cambio climatico,” Oduber a splica.

Segun Oduber, un di e aspectonan mas importante di e reconocemento ta cu Aruba a logra esaki door di un amplio proseso di co-creacion y dialogo social. Gobierno, NGO’s, comunidad cientifico, sector priva, sector turistico, piscadornan, institucionnan educativo y hobenan tur a contribui den forma e vision comparti aki.

Aruba awo tin oportunidad pa bira un “living laboratory” y centro regional di estudio y innovacion den area di desaroyo sostenibel, compartiendo experiencia y siñando hunto cu otro reserva di biosfera den Caribe y den resto di mundo, segun Oduber a expresa.

Na final di su declaracion, Oduber a enfatisa cu e exito di e Biosphere Reserve no ta depende solamente di e reconocemento di UNESCO, pero di e compromiso colectivo di comunidad Arubiano.

“Su exito lo depende di nos compromiso comparti, nos dialogo social continuo y nos disponibilidad pa sigui traha hunto pa un Aruba mas resiliente, prospero y sostenibel,” el a conclui.