(NLTimes) – Mucha y hoben na Hulanda ta bisa cu nan ta sinti nan mes ignora pa gran parti pa politiconan y ta profundamente preocupa pa intimidacion, scarsedad di vivienda y seguridad, tanto den nan barionan como na nivel nacional, segun e Conseho pa Hubentud di UNICEF 2025 cu a sali dialuna durante Jongeren Prinsjesdag, un evento anual cu ta presenta directamente na nan hendenan cu ta traha politica.
E encuesta di mas cu 1.200 hoben di edad 10 pa 18 a haya cu 41% ta mira intimidacion como nan preocupacion social principal, mientras cu 36% ta preocupa pa e falta di vivienda pagabel y un parti igual tocante seguridad.
Hobennan a balora con serio politiconan ta tuma nan opinionnan na 4.4 di 10, un poco abou for di 4.5 aña pasa, y alrededor di 40% a bisa cu politiconan ta comporta nan mes inapropia, citando argumentonan publico, conducta infantil y priorisa interesnan di adulto.
Hobennan di mas edad a enfatisa cu atencion na intimidacion mester inclui comprondemento di e motibonan di e actornan. Un mucha muhe di 17 aña a bisa, “Kizas nos mester wak tambe di unda e comportacion ta bini. Duna nan un otro salida.” Un otro hoben di 17 aña a remarca su preocupacionnan tocante e mercado di vivienda: “Mi ta puntra mi mes con mi por paga un cas, y mi ta preocupa caba pa spaar.”
“Muchanan na Hulanda ta 3.3 miyon. Si e maneho kier traha pa nan, nos mester wak nan no solamente como un grupo meta, pero tambe como partnernan di combersacion. Ser scucha ta un derecho di mucha importante y ta haci un diferencia pa un maneho efectivo”, segun Suzanne Laszlo, directora di UNICEF Hulanda. Segun informe, e conseho a ser entrega na Secretario di Estado di VVD, Judith Tielen, den un bus di scol na Prinsjesdag.
