(AP) — Reguladornan di Union Europeo a lansa un investigacion nobo anticompetencia riba Google, e biaha aki riba e pregunta si e gigante di tecnologia Mericano ta sofocando competencia den tecnologia di aviso digital.
E Comision Europeo a bisa ayera cu a habri un investigacion formal riba si Google a viola e reglanan di competencia di e bloc door di faborece su propio servicionan di aviso display online a custia di rivalnan editor-, aviso-, y servicionan di tecnologia di aviso.
E investigacion ta resalta e preocupacion di Europa pa e dominio di Google den industria di aviso online, y si ta explotando su bentaha di data pa cementa su posicion den e mercado di aviso display, cual Comision di UE ta calcula tin balor di 20 biyon euro anualmente.
E luna aki, autoridad anticompetencia di Francia a multa Google mas di 220 miyon euro pa abusa su dominio den aviso online mientras cu na Reino Uni a duna e vigilante anticompetencia un rol supervisando su retiro di ‘cookies’ cu ta track aviso for di e browser Chrome pa resolve un investigacion.
Avisonan display online ta e banner y texto cu ta aparece riba website manera homepage di corant, y ta personalisa basa riba historia di browser di un usuario di internet. Avisonan den buskeda, den contraste, ta aparece hunto cu e resultadonan di un motor di buskeda y ta basa riba palabranan clave cu e usuarionan ta buscando.
E comision, e brasa ehecutivo di UE y e principal agente antimonopolio di e bloc, a señala cu ta investigando particularmente na YouTube y si Google ta usando e posicion dominante di e website di comparti video pa faborece su propio servicionan di benta di aviso door di impone restriccion riba rivalnan.
Google a bisa cu competencia den aviso online a haci nan mas pagabel y relevante, a reduci prijs y a expande opcion pa publicista y esnan cu ta pone aviso.
“Miles di negoshi Europeo ta usa nos producto di aviso pa alcansa cliente nobo y paga pa nan website tur dia”, Google a bisa den un declaracion prepara. “Nan ta scoge esakinan pasobra nan ta competitivo y efectivo. Nos lo continua participa constructivamente cu Comision Europeo pa contesta nan pregunta y demostra e beneficio di nos producto pa negoshi y consumidor Europeo.”
E investigacion ta señala un esfuerso renoba di Margrethe Vestager, hefe di competencia di e Comision di EU y vicepresidente pa digital, pa controla poder di mercado di Google.
Ya caba el a impone riba Google un total di 8.2 miyon di multa den tres caso separa anticompetencia. Tabatin critica, sinembargo, cu e investigacionnan a dura demasiado largo y e multa no ta suficiente disuasivo pasobra e compania por paga nan facilmente.
“Servicio di aviso online ta den curason di con Google y publicistanan ta monetisa nan servicio online”, Vestager a bisa. Google ta colecta data pa usa pa avisonan enfoca mientras tambe ta bende espacio pa aviso y ta actua como negociador entre esnan cu ta pone aviso y contenido online, el a bisa. “Nos ta preocupa cu Google a hacie mas dificil pa servicionan di aviso online rival competi den e asina-yama tech-stack di aviso”, Vestager a bisa.
Comision di UE a bisa cu ta investigando e forma con Google ta usa tecnologia pa negocia benta di aviso display entre esnan cu ta pone aviso online y esnan cu ta pone contenido.
Pa cuminsa, oficialnan ta examinando e rekisitonan pa usa e plataformnanan di cumpra aviso in-house di Google pa cumpra aviso display riba YouTube, mientras servicionan rival potencialmente ta restringi den e forma cu nan por pone aviso riba e website di comparti video. Tambe ta investigando si e varios plataforma di aviso di Google ta faborece otro.
Otro area cu e comision ta investigando ta restriccionnan cu Google ta pone riba esnan cu ta cumpra aviso, editornan y bendedornan di aviso rival pa haya acceso na data riba e identidad y comportamento di usuarionan na cual e propio servicionan di aviso di Google tin acceso. Data asina por ser usa pa personalisa aviso na usuarionan individual.
Tambe bao microscop ta e plannan di Google pa retira ‘cookies’ di browser tercero riba Chrome y tagnan identificando aviso riba aparatonan Android cu ta opta pa no mira aviso personalisa, como parti di e plan di e compania pa reforsa medidanan di privacidad. E comision ta evaluando con e plannan aki lo afecta mercadonan di aviso digital.
Reguladornan di UE tin poder pa impone penalidadnan na balor di 10% di e revenue anual di un compania. Pero ta un prijs barata pa companianan afluente manera Google, cu a registra un ganashi di $17.9 biyon den su ultimo kwartaal, y e comision ta buscando otro metodonan mas leu cu multanan exorbitante.
Vestager a cuminsa usa ‘medidanan interino’ como un forma rapido pa stop comportamento anticompetetivo mientras ta ehecuta investigacion. Tambe e tin un rol lider den actualisa e reglanan digital di UE, cu medidanan enfoca riba controla e gigantenan tecnologico y preveni cu nan ta atrapa e mercadonan digital na prome luga.
