Union inespera den parlamento pa amienda

editorial 2_15_1.jpg

E sorpresa grandi  den e reunion publico di parlamento di diahuebs ultimo tabata e acuerdo cu a keda pacta entre e cuatro fraccionnan. Oranan largo e publico cu a presencia e acontecimentonan mester a warda te cu e delegacionnan a caba di delibera. E resultado: un amienda conhunto encuanto introduccion den Codigo Civil di un areglo di registracion di pareha, inclusivo esnan di mesun sexo.

E sorpresa mas grandi tabata naturalmente e posicion di e fraccionnan den oposicion, unda hopi lo a pensa cu nan lo a laga e partido den gobierno mes resolve su problemanan interno. Y e division aki tabata serio, mirando e tono cu  a uza den intercambio di palabra entre miembro di e fraccion gubernamental.  Sin embargo, e amienda a keda ‘saved by the bell’ pa oposicion cu aparentemente tabata opina cu nan mester asumi nan responsabilidad etico y moral y haci loke nan tabata kere ta e paso corecto. Esaki a desemboca den un amienda di consenso, cu a reemplasa e amienda original di parlamentario De Sousa Croes.

Remarcabel ta cu den ningun di e partidonan grandi tabata existi union di pensamento. Parti di ambos a vota contra o a evita e confrontacion percurando cu nan no tabata den sala pa vota. Esaki, y mas cu tur cos e forma di sorpresa den cual tur cos a tuma luga, a laga ambos partido grandi cu hopi cos di splica na e parti mas conservador di nan base. Esaki ta conta mas ainda pa partido MEP, cu tabatin e opcion pa hala un banda y laga e partido den gobierno resolve nan mes problema, cu e pensamento cu sin amienda riba mesa, keto bay tabatin e opcion pa recomenda un referendum riba e topico. A scoge, a primera biaha a base di consenshi, pa sigui loke tabata considera corecto pa haci, esta habri paso legal pa e grupo minoritario importante aki.

E paso aki lo por duna nan gradicimento eterno di e partido den gobierno, pero ta miho pa no spera nada como recompensacion. E reunion publico pa cuestiona maneho di ministro encarga cu Infrastructura a sigui un dia despues manera nada no a pasa, sin un rastro di e unidad moral cu tabata reina entre parti di e dos fraccionnan grandi, cu e fraccion gubernamental dunando apoyo completo na nan ministro. E banda gubernamental mas bien a limita nan mes na e bochincha custumbra ora oposicion tabata hiba palabra. Esey lo ta asina den e proximo reunion, despues cu e reunion a keda suspendi te dia 14 di september. E interpelacion unda e ministro tabata na palabra durante mas di cinco ora, sin realmente contesta e preguntanan haci a resulta un show bochornoso cu a cay hasta bao di e nivel di su colega di turismo di algun dia pasa. Esaki den presencia di Ministro Presidente, cu no tabata duna señal ni di disfruta, ni di desaproba e actuacion di su colega. Mirando e ambiente reinante den e reunion, por anticipa cu den e continuacion di esaki nada sorprendente lo bay tuma luga. Consecuentemente e mocion entrega pa oposicion pa encarga Controlaria General cu un investigacion encuanto e sistema di maneha otorgamento di erfpacht no lo yega na aprobacion. Un aspecto cu no a haya atencion den e preguntanan di oposicion ta e hecho di e exigencia di parti di e ministro di un ‘contribucion social’ pa otorga tereno erfpacht, mientras cu esaki tabata un di e puntonan mas concreto den henter e asunto.

En todo caso, den e tempo cu ta bin lo sali na cla ken tin mas di splica na nan hendenan. Esey no ta parce AVP, pasobra e division den e partido riba e tema aki ta conoci pa hopi tempo caba y e fraccion por laga e asunto nan tras pasobra esnan contra a vota segun consenshi y esnan na fabor a logra nan meta.  Pero e ‘move’ haci pa fraccion di MEP a trece na superficie e division interno cu tambe tabata existi caba, simplemente pasobra na nivel di opinion personal e diferencianan aki  ta existi. Tempo lo bisa si e partido aki a haci lo corecto, pero pa e momento aki parti di e base di partido a keda asombra y hasta rabia pa e paso tuma.

Nos ta tende bastante comentario a consecuencia di e resultado sorprendente aki. E ‘fall out’ politico sin embargo por ta otro cu ta anticipa. Esnan cu ta specula cu e tema aki lo ta bay tin un impacto grandi den eleccion otro aña por sali ekiboca. Un aña ta hopi tempo pa lubida y ta trece hopi otro asunto dilanti cu pa e votado ta importante y ta move nos den otro direccion. Ademas no mester lubida cu esnan, independiente di cual partido nan ta apoya, cu ta na fabor di e cambionan introduci, a keda satisfecho cu e resultado aki. Un biaha mas por constata cu e forma di introduci e reglanan legal nobo aki lo no gana ningun premio pa bunitesa, pero nan ta awor un realidad pa semper.  

You May Also Like

Venezuela den mira… Tambe encuanto refineria…

Nos bisiñanan na otro banda di lama ta centro di noticia internacional actualmente, sin ...

E prome rupturanan den coalicion? O tempo pa reflexiona…

Den e dianan aki presupuesto 2019 ta loke mester ta captando nos atencion. Loke ...

Gasolin ta subi, atrobe

Prijs di gasolin a subi ayera atrobe, te casi Afl. 1,80 pa liter. Nos ...

editorial 2_15_1.jpg

Guera cu gobernador a caba o ta cuminsa?

  Mientras a bira inevitabel pa gobierno y su subalternonan den parlamento cumpli cu ...

Plan di gobernacion Hulandes cu punto interesante

Cos pa considera aki? Despues di siete luna Hulanda tin gobierno nobo. Den su ...

Empleado tin ultimo palabra?

Encuesta ta un instrumento tricky Nos a topa cu un discusion interesante e siman ...