Unit Narcotica ta sigui haya droga den diferente cas na Aruba

Cuerpo di Polis ta mas activo riba caya pa loke ta trata bendemento di droga na unda nan a informa mediante un comunicado di prensa cu ayera diabierna, den oranan di mainta, Unit Narcotica a tene un accion y a haci un entrada hudicial na Kamay.

Na e sitio a detene un persona, un hende homber naci na Aruba cu inicial J.P.E. en conexion cu bendemento di marihuana, cocaina y como tambe XTC.

Na e sitio a confisca basta droga; pa esaki nan indica cu e investigacion ta andando ainda y no ta descarta cu lo por tin mas detencion.

Di mesun manera, dia 25 di juli Cuerpo di Polis tambe a informa tocante un entrada cu nan a haci na a 1 cas na Kamay y un cas na Kurimiauw.

Den e cas na Kamay a encontra droga y a detene un hende homber di inicialnan J.P.E. naci na Aruba di 23 aña di edad.

Na e cas na Kurimiauw a detene un hende homber di inicialnan G.D.S. naci na Aruba di 40 aña.

Pa 18 di augustus, e instancia tambe a señala cu 17 di augustus ultimo, den oranan di anochi, team di aresto a haci un entrada hudicial na un cas situa na Macuarima.

Na e cas a tuma luga dos detencion esaki en conexion cu un investigacion andando di e Unit Narcotica. E dos personanan deteni ta un hende homber J.E.G. y un hende muhe S.F.Y.F. tur dos nacionalidad Hulandes.

Igualmente 18 di augustus, den ora nan di atardi, relaciona cu e mesun caso, team di aresto a haci un entrada hudicial na un cas na Bushiri. Akinan a detene 1 homber J.H.G.M. di nacionalidad Colombiano y tambe a detene un persona indocumenta.

Durante e accion a confisca basta droga (cocaina y marihuana) como tambe auto. Nan no a descarta cu lo por tabatin mas detencion.

Unit Narcotica ta un unidad di Cuerpo Policial Aruba cu oficialmente a ser lanta dia 1 augustus 2023. E unidad ta investiga tur loke ta bendemento di droga for di casnan, ariba caya, delivery, plataforma social y hasta area di hotelnan. Tambe e unidad ta investiga tur droga cu ta intercepta pa Aduana, US Customs na aeropuerto, y door di ambtenaarnan di KIA tambe tur droga encontra durante cualkier control policial. Unit Narcotica ta resorta directamente bao di Comisario di Algemene Dienst.