Universidad di Aruba: Clausura di aña academico di e programa Organization Governance and Management

Despues di a inverti hopi tempo y dedicacion e studiantenan cu no tin e asina yama herkansing por disfruta di nan vacacion. E aña academico 2015-2016 di Universidad di Aruba a clausura oficialmente dia 17 di juni pa e studiantenan di Organization Governance and Management (OGM). Anualmente e estudio OGM ta celebra e clausura di aña academico cu un evento pa evalua e aña y aprecia tur esfuerso cu studiantenan a desplega.

E aña aki e evento a tuma luga na e Acomodacion Multifuncional di Noord (MFA Noord). E slogan di e dia tabata ‘refleha riba pasado pa prepara pa futuro’. E meta tawata pa e studiantenan refleha riba nan desaroyo pa asina nan por pone metanan nobo pa sigui crece  y desaroya den e areanan personal, academico y profesional.

Ademas studiantenan den e di dos aña a presenta nan proyectonan pa e modulo Community Project. E presentacionnan tabata hopi interesante. E studiantenan a demostra claramente cu nan por a combina teoria cu practica y den e mes un rosea nan por a contribui na proyectonan den nos comunidad. Den e cuadro aki studiantenan a colabora cu e siguiente fundacionnan cu ta Fundacion Padu, Fundacion Museo Arubano, Switch Foundation y ATHA (‘Asociacion Trabou pa Hubentud na Aruba’). Tambe un grupo ta trahando un investigacion preliminar pa e  proyecto Alimento di Minister di Asuntonan Social.

E team di Organization Governance and Management kier a felicita tur studiantenan di UA y di Aruba cu a pasa tur nan modulonan, a bay over y esnan cu a gradua na scolnan secundario. Tambe kier felicita specialmente studiantenan di OGM mes cu ta preparando pa gradua den luna di juli. Por ultimo kier a  haci uzo di e oportunidad pa  gradici e empleadonan di MFA pa e bon trato y hospitalidad cu nan a brinda e studiante y docentenan di OGM.