Dialuna ultimo dentista Hendrik Marsman a tene un conferencia durante cual el a trece dilanti su preocupacion relacion cu operacion di un universidad di medicina y dentista na Aruba cu segun e, ta dañando nomber di Aruba pa diferente motibo. E universidad en cuestion a emiti un comunicado prensa recien pa asina clarifica e acusacionnan aki y sigura cu nan ta opera segun ley y di forma profesional.

E universidad en cuestion, Nucleus University School of Medicine &Denstistry Aruba, a indica cu nan comunicado di prensa cu nan a tuma nota di alegacion haci den direccion di nan universidad, y pa es motibo ta tuma e oportunidad pa publicamente clarifica cualkier confusion y alegacion den nan contra pa loke ta trata nan operacion y e curriculum di educacion di nan estudio pa dentista.

“Nos di NUSOMD ta kere y para e pa berdad y en conexion cu esaki nos kier introduci nos mes. Na Nucleus University School of Medicine & Dentistry, nos meta ta bay mas leu cu solamente enseñansa. Nos ta na Aruba cu un mision serio y sincero: pa yuda mehora e area di cuido dental, pero tambe amplia e acceso na cuido dental y pagabel. Nos meta mas importante ta pa forma e proximo generacion di profesionalnan medico den cuido dental. Cu bon guia di profesional capacita,” e comunicado ta indica.

E universidad ta sigui splica cu nan programa di enseñansa dental cu ta den programa CAAM-HP y outreach clinic ta dedica pa sirbi e comunidad cu profesionalismo y curason. Studiante nan di entre otro Canada, USA y otro parti nan di mundo ta sigui nan estudio na e universidad aki y segun nan ta indica nan ta ofrece studiantenan local tambe e oportunidad pa sigui nan estudio cu becanan na mitar di e costo regular pa estudio di dentista.

“Nos ta comprende cu progreso por trece cambio, pero nos ta kere firmemente cu Aruba ta un luga cu ta balora creacion, inclusion y oportunidad. Nos no ta aki pa complica, mas bien nos ta aki pa colabora, sirbi y trece un futuro mihor hunto…Nos ta honra pa ta un parti di comunidad di Aruba, y nos ta compromete pa traha man den man pa un acceso mihor pa cuido di salud pa tur hende,” e comunidad a termina.

Aunke e comunicado ta un reaccion riba e comentarionan recien di dentista Marsman, e no ta ofrece un clarificacion directo ni specifico riba e puntonan cu e dentista Arubiano a trece dilanti durante su conferencia di prensa dialuna ultimo.

Segun dentista Marsman ta indica na e universidad en cuestion tin dentista ta traha cu a bin for di India, a haya permiso di DIMAS pa traha como profesor pa duna les, pero nan ta traha den boca di pashent y nan no tin AruBIG. El a indica cu nan lo a aplica pa AruBIG, pero no a hayele pasobra e diploma cu nan tin nan no por traha cune na Aruba.

Segun el a conta e dentista cu ta traha na e universidad a trata un pashent, a cobrele y despues a sali un email anonimo pa Instituto di Calidad cu a termina na un bishita pa informa e dentista aki cu e por traha den boca di pashent y a stop cu esey. Pero awor, segun el a bisa el a compronde, nan a contrata un negociante Arubiano cu ta emplea dentista di Colombia y ta huur un parti di e universidad pa trata pashent.

loke ta preocupante p’e ta cu Inspectie Volksgezondheid ta exigi cu dokternan mester mantene den secreto e dossier di pashentnan cu tin datos personal, pero segun rumornan cu a yega cerca dje, e hendenan di e fundacion cu ta den directiva tin acceso na e dossier di e pashentnan pa wak kico ta ser haci y kico ta ser paga pasobra nan ta cobra comision pa esey pasobra nan ta duna e inversionista Arubiano e espacio pa wak pashent eynan.

Dentista Marsman tambe a trece dilanti cu algun studiante di e universidad a manda email pa diferente instancia reclamando cu nan a ricibi carta di e universidad bisando cu nan no lo por participa den nan examen final di e semester cu nan ta den si nan no paga prome e suma di e siguiente semester. Pues si nan no paga adelanta, nan no por participa den examen. Esaki, segun dentista Marsman por ser mira como cu e studiantenan ta secuestra y ta ser “blackmailed” pa e universidad, y pa motibo di esaki algun studiante a haya stress y bandona e estudio.

El a indica cu den e carta aki e studiantenan ta splica tambe cu nan no ta hayando nada di loke nan a ser priminti. Nan a ricibi hopi promesa di e universidad, pero nada no ta pasando.

Pa loke ta trata e parti practico di e estudio na unda e studiante tin cu siña ranca djente, bora djente, pone vulling, siña tur e materialnan, el a indica cu mester di un luga caminda e studiantenan por train y mester tin supervision. Esey no tin na Aruba pa e studiantenan di e universidad aki, segun el a indica. El a menciona cu nan a purba haya e clinica di Aruba pero no a bay bon, despues a purba cu Universidad del Bosque na Colombia, pero no a logra tampoco.

El a indica cu segun e por a compronde aworaki nan lo ta bezig ta check algo na Africa pa manda e studiantenan. “Mi pregunta ta si nan ta bin di Canada, dicon nan no ta hacie na Canada. Kico ta e problema eynan? Pasobra nan no ta acredita niun caminda, e diploma aki no ta acredita niun caminda y Aruba tampoco ta reconoce,” el a remarca.

Pa por traha na Aruba, un persona cu diploma di e universidad aki por tuma e boardexamen na Merca of Canada y si nan pasa esey nan por traha na Aruba como dentista, pero dentista Marsman tin duda fuerte cu un persona cu a studia na e universidad aki lo por pasa e examen ey den futuro basa riba e curriculum cu e universidad tin.