UPP: “Mededingingsautoriteit” ta necesario pa progreso, desaroyo, bienestar y felicidad di e pueblo Arubano.

 

Raymond Hernandez y Booshi Wever (UPP)

 

Ya caba pa algun tempo partido UPP a bin ta mustra riba e ausencia di un “Mededingingswet” aki na Aruba. Mientras cu den paisnan di Reino esaki ta un organo cu ya ta existi, aki na Aruba, mescos cu ta e caso di Ombudsman, Ley di Financiamento di Partidonan Politico, y Dios sa cuanto cos mas, nos ta keda atras riba desaroyonan cu mester reglamenta nos mercado. Si riba tereno gubernamental nos di UPP ta mustra cu mester introduci e reglanan estricto di Good Governance (Bon Gobernacion), UPP ta kere cu esaki tambe mester refleha su mes den sector priva cu Good Corporate Governance, na unda cu ey tambe lo mester tin reglanan di bon administracion pa asina salbaguardia e interes di loke ta shareholders, pero tambe di e trahadornan. Pa e ultimo aki UPP a mustra caba den comunicado recien cu Parlamento por medio di nos Codigo Civil, lo mester amplia e asina yama “enqueterecht” y haci esaki tambe posibel pa tanto sindicatonan y trahadornan por cuestiona cierto situacionnan den companianan pa evita cu despues nan ta keda mal para, manera ta e caso di InselAir, Auracasino, Sr. Frog y otronan.

Loke tambe ta importante ta e autoridad pa controla e formacion di cartelnan economico. UPP ta na altura, cu ya caba for di 2014 un autoridad asina a ta funciona na Corsou, despues cu gobierno Hulandes a pone expertonan disponibel pa tanto Aruba como Corsou na 2012/2013 pa yega na un ley asina. Mientras na Corsou si politiconan tabata tin e curashi pa introduci esaki, na Aruba nos tin comprendi cu esaki ta hinca keto bay den lachinan scondi.

Kico ta formacion di cartel? Esaki ta na momento cu un grupo di comerciante of inversionistanan ya bon estableci ta purba na cumpra of tuma over tur companianan cu por ta su concurentenan, pa asina crea e monopolio. Asina bo por bin cu fusion di companianan (un of mas compania ta bira uno); aliansanan (ta haci palabracionnan den sectornan), cartelnan (cu ta formalisa nan mes den un grupo di interes), of ta crea un monopolio completo bou un inversionista cu ta run mesun tipo di negoshinan asina.

Kico ta e consecuencia di esaki? Uno haciendo palabracionnan por stipula un prijs riba mercado, unda no ta bende bou un cierto prijs. Asina aki p.e. prijs pa un saco di cement, ken sea importe, ta mara na un prijs bou cual ningun hende por bende. Esaki ta haci cu e prijsnan pa hopi producto ta keda artificialmente halto, cu e proposito pa probecho pa e companianan.

Un otro forma ta e monopolio, ta p.e. na unda cu e trabounan di waf practicamente ta den man di un solo inversionista, cu ta stipula un prijs pa p.e. baha container. Na Aruba ta conoci for di hopi tempo caba cu baha un container na Aruba ta dobbel di prijs cu na Corsou, djis pa nos keda cerca. E mesun inversionista aki tin interes den otro wafnan, cu na su turno lo obstaculisa pa e waf di Aruba por bira en realidad un hub entre Europa y continente Mericano (Sur y Norte).

Un otro concecuencia ta tambe, cu e formacion di tipo di cartelnan aki, ta sera porta pa otro tipo di inversionnan sea di inversionistanan local, particularmente nos Young Entrepeneurs, y tambe di potencial inversionistanan stranhero cu por nifica cuponan di trabou pa nos Young Professionals y otro hobennan cu ta caba scol secundario aki na Aruba. Y last but not least, Aruba, e pueblo, ta keda depriva di prijsnan competitivo y mas barata, cu por trece alivio den cartera di e consumidor.

Pues introduccion di un asina yama “mededingingsautoriteit” ta funesto pa e desaroyo economico di Aruba, particularmente awor cu economia ta stanca. Tambe esaki por contribui na progreso economico di pais, di nos inversionistanan local nobo cu si ta kere den competencia, particularmente pa nos hobennan cu kier cuminza cu un negoshi.

Y na final un ley anti-cartel asina lo percura pa prijsnan mas abou, pa cuminsa di importacion, pa sina e pueblo por hala rosea. Tanten cu ningun di nos parlamentarionan no ta papia di esaki, tanten cu mayoria di partidonan politico ta keto riba esaki, e promesa di aumento di pension di biehes, flexibilisacion of bahamento di edad di pension, aumento di minimumloon, of ampliacion di canasta basico, ta keda ilusorio. Pasobra formacion di cartel y monopolio ta contribui solamente na bienestar di esnan cu kier haci ganashi riba lomba di pueblo. Y UPP ta compremeti, cu esaki tambe ta algo cu mester bini, pa asina nos por traha di berdad na UN MIHO MAÑAN pa Aruba. Esaki no pa un “happy few” pero pa henter nos pueblo!!

You May Also Like

Cristiannan sea alerta pa eleccion 2017

Nos tur por observa e desaroyo di e campaña politico pa eleccion benidero. Partidonan ...

‘Presupuesto supletorio mester ta un herment pa ahusta y control, no ultimo recurso ora baca a hoga’

Diaranson mainta parlamento di Aruba tabata den sesion publico pa tratamento di Presupuesto Supletorio ...

mas (1).JPG

Partido MAS kier duna pueblo claridad riba e Bridge Loan

Despues di a tuma nota den prensa tocante e Bridge Loan pa nos pais, ...

‘Gabinete Wever-Croes abusando di fondo publico creando funcionnan’

Parti di un maneho financiero responsabel ta controla bo gastonan y basa nan riba ...