Ayera mainta a tuma lugar un reunion den parlamento di Aruba tocante e Landsverordening Instelling Ministeries, LIM. Durante e tratamento, fraccion AVP a entrega un mocion exigiendo e nombramento di un minister Plenipotenciario na Hulanda lo mas pronto posible.

Mientras cu e LIM mes tabatin su propio controversia, basa principalmente riba e conseho negativo cu Raad van Advies a emiti tocante esaki, un punto cu a hala atencion ta e nombramento di minister Plenipotenciario.

Ausencia
Na augustus caba, e propio fraccion di AVP a hala atencion na e falta di minister Plenipotenciario.
Despues di retiro di Sr. Ady Thijsen como Minister Plenipotenciario, Gabinete AVP-FUTURO a nombra dos candidato, primeramente minister Rene Herde y despues parlamentario Jennifer Arends-Reyes, pero na final ningun di dos nombramento a ser concretisa y te dia di awe ainda no tin un Minister Plenipotenciario.

Na momento cu Gabinete AVP-FUTURO a haci su entrada como gabinete, Sr. Thijsen a ricibi su “eer van ontslag” como Minister Plenipotenciario na Hulanda, pero tabatin cierto consideracionnan tambe basa riba e hecho cu Sr. Thijsen tabata representante di Aruba den Union Europeo, Gabinete Wever-Croes a duna Thijsen dos luna pa completa su transicion.

Despues di su huramentacion, Gabinete AVP-FUTURO a nombra Sr. Rene Herde como e candidato oficial pa bira Minister Plenipotenciario. Pero esaki no a keda concretisa y Sr. Herde a ser nombra minister di Infrastructura, Energia y Telecomunicacion na luga di parlamentario Mike de Meza.

Despues Gabinete AVP-FUTURO e ora a nombra parlamentario Jennifer Arends-Reyes como candidato pa e cargo di Minister Plenipotenciario, loke e parlamentario a rechasa.

Mediante un comunicado di prensa, parlamentario Arends-Reyes a informa cu despues di reflexion profundo y consideracion serio”, el a tuma e decision pa no acepta e oferta pa bira e proximo Minister Plenipotenciario di Aruba na Hulanda. Segun e parlamentario, despues di haya hopi conseho y analisa e situacion di reto cu e pais ta enfrenta actualmente, el a conclui cu su lugar ta aki na Aruba. Segun e comunicado, e decision pa keda Aruba no ta uno tuma facilmente, pero cu un profundo sintimento di responsabilidad y amor pa su pais.

Prome cu a nombra actual minister Rene Herde como candidato partido AVP, durante proceso di formacion partido AVP a presenta Sra. Desriee Croes como nan candidato pa bira Minister Plenipotenciario, pero segun partido MEP a indica den un comunicado di prensa, minister Gerlien Croes, e tempo ey como formador, a rechasa e candidato di AVP.

Na september, parlamentario Endy Croes di fraccion MEP a entrega un mocion den cual nan ta pidi gobierno pa nombra Sra. Desiree Croes como Minister Plenipotenciario. Un mocion cu mayoria di fraccion AVP no a sostene, cu excepcion di parlamentario Mike de Meza.

Durante su discurso di motivacion di voto, parlamentario di fraccion AVP Stephany Sevinger a indica cu e fraccion no lo sostene e mocion aki. El a splica cu fraccion AVP tin hopi respet pa Sra. Desiree Croes y cu nan no ta duda den su capacidad pa fungi como Minister Plenipotenciario na Hulanda. “Tur hende ta consciente di su preparacion y dedicacion pa Aruba. Esaki no ta un punto cu nos lo debati,” el a remarca.

El agrega cu mescos cu su coleganan di e otro fraccion, nan tambe ta di opinion cu nombramento di un Minister Plenipotenciario lo mester tuma luga lo mas pronto posibel, pero alabes el a enfatisa cu esey ta un decision cu gobierno mester y por lo tanto parlamento lo mester respeta gobierno su derecho pa scoge e persona cu nan ta sinti ta capacita y cu ta loke nan lo kier pa fungi den e rol aki.

Na mesun momento parlamentario Sevinger a expresa cu e mocion aki ta un movemento politico cu e meta pa crea division. “Mi no por keda sin resalta cu esaki ta claramente un movemento politico cu fin di crea division y por lo tanto mi ta spera cu pueblo por tuma nota di con ta haci uso di parlamento pa hunga wega aki den. Debi na esaki fraccion di AVP ta contra di e mocion aki,” el a subraya.

A pesar cu Sevinger a indica cu fraccion AVP ta contra e mocion, un parlamentario di e fraccion, Sr. Mike de Meza a vota na fabor di esaki. E mocion a ricibi ocho voto na fabor, 11 contra y dos parlamentario, Otmar Oduber y Hendrick Tevreden cu a abstene di vota, cual ta nifica cu e mocion no a ser aproba.

Minister Plenipotenciario a base interino

Finalmente na october, a bira conoci cu Gabinete AVP-FUTURO a tuma decision pa por lo pronto no nombra un minister plenipotenciario na Hulanda. Esaki a trece cuestionamento y preocupacion di parti di e partido mas grandi di oposicion, MEP.

Durante un conferencia di prensa na october, parlamentario Xiomara Maduro (MEP) a remarca cu e decision por ta un violacion di Statuut pa Reino Hulandes y por tin consecuencia grandi pa e autonomia y representacion di Aruba den Reino.

El a splica cu na lugar di nombra un minister plenipotenciario permanente na Hulanda, Gobierno a bisa cu lo manda minister di Aruba mes pa representa e pais na reunionnan. Minister di Relacionnan di Reino, Gerlien Croes tabata na Hulanda pa atende e reunion di Conseho di Minister di Reino (Rijksministerraad) e luna ey.

Segun eGobierno, e paso aki ta un manera pa “spaar placa”, eliminando gasto cu tin cu mantene un minister.

Pero Fraccion di MEP a mira e decision aki como uno peligroso cu ta debilita Aruba su voz y su presencia politico den Hulanda — na un tempo cu e relacionnan di Reino mester di mas dialogo y representacion.

Maduro a subraya cu e decision di gobierno ta contra Statuut, pasobra den Statuut Articulo siete ta indica cu den Conseho di Minister di Reino, ta e minister plenipotenciario por atende esaki y ta esun cu tin cu sinta na mesa den e reunion aki, pues, segun e parlamentario, un minister di Aruba no por simplemente bay y sinta den e reunion.

Parlamentario Maduro a enfatisa cu e trabao di un minister plenipotenciario ta mucho mas amplio cu simplemente bay un reunion pa luna. El a splica cu e persona aki ta un enlace politico y diplomatico constante entre Aruba y Hulanda. E ta mantene contacto cu miembro di Eerste y Tweede Kamer, cu autoridadnan di diferente ciudadnan, y cu embahadornan di otro pais. E ta representa Aruba den evento y recepcionnan diplomatico, algo cu e parlamentario a enfatisa ta esencial pa defende Aruba su interesnan.

Ademas, el a indica, e minister plenipotenciario tin un rol humano y social importante. E ta tene contacto cu studiantenan y diaspora di Aruba na Hulanda, y e ta representa Aruba den organisacionnan internacional manera OCTA. El a señala cu e decision di gobierno ta cuestionabel tambe pasobra si mira por ehempel e conseho cu Raad van State a emiti aña pasa, en conexion cu 70 aña di Statuut, e ta bisa cu mester fortalece e posicion di e minister plenipotenciario na Hulanda.

Carta di Fraccion AVP
 Den su mocion ayera, fraccion AVP a bisa cu “e posicion di Minister Plenipotenciario di Aruba na Den Haag ta di importancia esencial pa salvaguardia interesnan di Aruba dentro di Reino Hulandes.” Ademas, a reconoce cu actualmente e posicion ta yena a base interino sin un nombramento definitivo, pero ta importante pa haci un nombramento pronto “den interes di continuidad, representacion efectivo di interes y representacion diplomatico.”

Den e mocion a solicita pa gobierno “tuma e stapnan necesario a corto plaso pa nombra un minister Plenipotenciario cu ta posee e experiencia diplomatico, conocemento administrativo y determinacion adecuado pa asina salvaguardia efectivamente e interesnan di Aruba dentro di Reino.”