Uso di app pa ‘cumpra awor, paga despues’ ta aumenta na Hulanda, generando preocupacion pa debe

(NLTimes) – E cantidad di hende na Hulanda cu ta usa apps di pago “cumpra awor, paga despues” a aumenta rapidamente, loke ta lanta preocupacion tocante debe y falta di proteccion di consumidor. Investigacion nobo encarga pa ING ta mustra cu mas o menos un di cada tres consumidor Hulandes a usa e forma di pago posponi aki.

ING a encuesta mas cu 1.500 adulto den e pais. Hopi di e encuestadonan a bisa cu nan ta aprecia di por pospone pago te despues di a ricibi un compra online. Sinembargo, Japke Kaastra, hefe di salud financiero na ING Nederland, a adverti cu e comodidad aki ta carga riesgonan. “E por bay robes si hende cuminsa us’e pa cumpra cosnan cu en realidad nan no tin e placa p’e,” Kaastra a bisa.

E estudio a haya cu 10 porciento di usuarionan ta depende di cumpra awor, paga despues servicio pasobra nan no tin suficiente fondo na momento di cumpra. Mas o menos un tercera parti a admiti cu nan a experencia problemanan di pago. Den 11 porciento di casonan, consumidornan a cobra gastonan adicional pa pago laat. Tres porciento finalmente no por a paga e montante cu nan tabata debe. Segun ING, mas cu tres cuarto di esnan cu a confronta problema cu cumpra awor, paga despues tambe ta fia placa otro caminda.

E modelo di pago aki a hala critica creciente, particularmente pasobra hopi hoben ta us’e. Un problema adicional ta cu e Autoridad Hulandes pa Mercadonan Financiero, esta AFM, actualmente no tin poder pa supervisa proveedornan manera Klarna.

“E legislacion cu lo proteha consumidor mihor lo drenta na vigor solamente aki un aña y mey. Claramente tin mester di mas proteccion di consumidor awor,” Kaastra a bisa. “cumpra awor, paga despues tin biaha ta sinti mucho facil. E por conduci na consumo di mas, perdida di supervision y, finalmente, debe.”

For di cuminsamento di e aña aki, e opcion pa pospone pago tambe a bira disponibel den algun tienda fisico. E gabinete a yama e desaroyo aki indeseabel, pero Klarna, e lider di mercado, a bisa na februari cu e lo no stop di ofrece cumpra awor, paga despues na puntonan di benta fisico.

Klarna a declara cu e ta tumando pasonan pa loke e ta yama “credito responsabel.” Diabierna, e compania a anuncia un funcion nobo den su app cu ta permiti usuarionan desactiva e opcion di pago diferi. “Di e manera aki, consumidornan por dicidi di antemano pa no usa credito, por ehempel ora di spaar pa un ocasion importante of ora di pega na un presupuesto estricto,” Klarna a bisa.