Recientemente riba rednan social e conocido activista Nigel Maduro a publica un video riba su pagina di Facebook den cual por mira un biaha mas un cantidad di vehiculo UTV ta core den partinan fragil di naturalesa. E biaha aki tabata na Andicuri. E publicacion a ricibi mas di 300 reaccion y cantidad di comentario di tanto residente local como bishitante cu a expresa nan tristesa y frustracion cu ainda gobierno no a implementa cambio pa loke ta trata uso di e tipo di vehiculonan aki.

E uso di vehiculonan all-terrain (ATV) y utility terrein vehicles (UTV) na Aruba ta un tema cu ta ser fuertemente debati ya cu habitante y bishitantenan ta trece preocupacion riba daño na medio ambiente, salud publico, y e impacto riba bida di comunidad. Mientras cu tournan off-road ta keda un actividad popular pa turistanan cu ta busca aventura, discusionnan riba rednan social ta refleha e intrankilidad tocante con e vehiculonan aki ta ser usa y regula rond di e isla.

Varios comentario den e publicacion di Maduro ta mustra cu areanan natural y cultural delicado ta ser afecta. “Andicuri alrededor di merdia. Un lugar keto cu ta considera sagrado pa localnan. Akinan bo ta wak con UTVs y turismo masal ta kitando lugar nan sagrado y keto for di nos,” Maduro a skirbi hunto cu e video cu el a publica.

Sentimentonan similar a ser ripiti pa otro usuarionan cu ta sinti cu areanan cu un tempu tabata conoci pa paz y reflexion no ta accesibel mas di e mesun manera.

Preocupacion pa medio ambiente tambe ta ser menciona frecuentemente. Un usuario a bisa cu no mester permiti tournan di UTV mas debi na e daño diario causa na naturalesa.

Otro a haci comparacion cu parkenan nacional den exterior, caminda comportacion similar lo por hasta resulta den aresto y boet. Den contraste, usuarionan ta sinti cu na Aruba tin poco consecuencia pa operador of chauffeur di e vehiculonan aki cu ta daña e paisahe, conduciendo na un percepcion di un “free for all” cu poco ehecucion.

Residentenan cu ta biba cerca di rutanan cu ta ser usa frecuentemente ta describi interupcionnan diario. Un usuario a comenta cu den e area di Sabanilla Abou henter un bario mester soporta stof, zonido duro, y hasta holor di combustibel toxico cu ta drenta casnan, siete dia pa siman for di mainta trempan te bahada di solo.

Otro habitante a comparti cu hasta cerca di nan cas, paz y trankilidad no ta existi mas, cu vehiculonan ta core den barionan y ta causa desordo mientras ta daña e ambiente natural.

Bishitantenan tambe a comparti experiencianan cu ta cuadra cu e preocupacionnan di e residentenan. Un usuario a describi con e y su famia tabata purba relaha ora diripiente nan a ser confronta cu loke nan a yama un “invasion di 15 minuut” di alrededor di 60 hende y por lo menos 24 ATV.

Mientras cu turismo ta un pilar vital di economia di Aruba, storianan asina ta sugeri cu actividad di ATV y UTV no maneha tambe por afecta e experiencia di e bishitante.

Varios comentario a expresa frustracion no solamente cu e vehiculonan mes pero cu loke ta ser percibi como un falta di respet y vision a largo plaso. Hopi ciudadano ta sinti cu ganashi ta ser priorisa riba proteccion ambiental, loke ta aumenta e miedo di comunidad pa loke ta trata preservacion di naturalesa. Otronan a expresa speransa cu medidanan di politica den futuro, incluyendo regulacionnan mas estricto di uso di tereno, por yuda atende e asunto.