(AP) – Polis Chines a bisa cu recientemente a detene un usuario di ChatGPT pa motibo cu aparentemente el a usa e chatbot pa crea un noticia falso tocante un accident cu trein cu nunca a tuma luga. E ta un di e prome accionnan cu autoridadnan ta tuma bao un ley recien pa regula ‘deepfake’ crea pa inteligencia artificial, cual ta imagennan, video of otro media digital fabrica pa inteligencia artificial cu ta parce real.
Segun reportahe di polis di e provincia Chines Gansu, un homber identifica solamente pa su fam, Hong, a usa ChatGPT pa crea un articulo tocante un accident cu supuestamente a causa e fayecimento di 9 empleado di construccion na Gansu. 21 cuenta riba un plataforma social popular, tur propiedad di compania di media basa na China, a plama e noticia aki dentro di un periodo cortico di tempo.
Di mesun manera cu mayoria website y di fuera y aplicacionnan, ChatGPT tecnicamente no ta disponibel na China danki na e pais su ‘Great Firewall’, cua lta censura internet pa e residentenan. Sinembargo e individuonan determina por haya acceso via VPN, Virtual Private Network cu ta ampliamente disponibel pa por evita e firewall. E reportahe di polis no a describi con Hong a logra usa ChatGPT.
Pa ora cu e oficialnan di Gansu a realisa cu e articulo aki tabata falso, ya caba e tabatin 15,000 bista segun e reportahe. Polis consecuentemente a haci inval na e residencia di Hong pa colecta evidencia y a tuma “medidanan di coercion criminal” contra Hong mes. Polis a usa e frase aki pa describi medidanan temporario pa limita e libertad di e sospechoso.
E ley nobo Chines a drenta den efecto dia 10 di januari y ta prohibi varios categoria di media falso produci pa “tecnologia di sintesis profundo” manera realidad virtual pero ta ofrece definicionnan cu no ta hopi specifico ni cla tocante hopi di e categorianan aki.
Segun e traduccion di e ley cu China Law Translate a provee, e ta prohibi e uso di ‘deepfake’ cu ta usa den actividadnan ncu ta pone e siguridad nacional den peliger, causa daño na e imagen di e nacion of e interes publico societal y stroba “orden economico of social”. Esaki ta prohibi e uso di e tipo di tecnologianan aki pa produci, publica of transmiti e noticianan falso.
