(AFP) — Un muhe ingeniero Aleman a bira diasabra e prome persona cu ta usa rolstoel cu a lansa bay espacio, den un biahe cortico riba un vuelo di Blue Origin.
E compania espacial, cu ta propiedad di multi-biyonario Mericano Jeff Bezos, a lansa su mision suborbital New Shepard pa 8:15 di mainta (1415 GMT) for di su localidad na Texas.
Michaela Benthaus, un ingeniero di aeroespacio y mecatronica na Agencia Espacial Europeo, tabata entre e pasaheronan cu a crusa e linea di Karman, e frontera internacionalmente reconoci di espacio, durante e vuelo di mas o menos 10 minuut.
Benthaus a sufri un lesion di medula spinal despues di un accidente di mountain bike y awor ta usa un rolstoel.
E raket chikito, completamente automatisa, a lansa verticalmente, y e capsula cu e turista nan a despues separa durante vuelo, prome cu baha suavemente back na desierto di Texas, frena pa medio di parachute.
Esaki tabata e di 16 vuelo cu tripulacion pa Blue Origin, cu ya ta ofrece vuelo di turismo espacial pa varios aña — e prijs no ta publico — usando su raket New Shepard.
Decenas di hende ya a biaha bay espacio cu Blue Origin, incluyendo cantante di genero pop Katy Pery y William Shatner, cu a interpreta e legendario Captain Kirk den “Star Trek”.
E bishitanan di alto perfil aki ta apunta pa mantene interes publico den e vuelo nan, den un momento cu companianan espacial priva ta competi pa dominio.
Virgin Galactic ta ofrece un experiencia suborbital similar.
Pero Blue Origin tambe tin ambicion pa competi cu SpaceX di Elon Musk den mercado di vuelo orbital.
E aña aki, e compania di Bezos a logra realisa dos vuelo orbital sin tripulacion usando su raket enorme New Glenn, cual ta significantemente mas poderoso cu New Shepard.
