(NLTimes) – Un homber di 25 aña di Alphen aan den Rijn a keda aresta diaranson despues di a menasa den un livestream di TikTok pa bay Tweede Kamer cu un hacha, bisando cu “cabesnan [ta] bay lora.” E video, ampliamente comparti riba medionan social den e ultimo dianan, a provoca un investigacion di e Unidad di Polis pa Politiconan Menasa na Den Haag, Ministerio Publico (OM) ta informa.

Ora a puntr’e durante e transmicion live cu ken e lo “cuminsa,” e sospechoso a contesta, “kizas cu Geertje,” aparentemente referiendo na e politico Geert Wilders. Ministerio Publico a clasifica e video como un menasa criminal dirigi riba miembronan di Tweede Kamer, specificamente Wilders.

Wilders a bisa cu e menasa aki tabata “repugnante,” ya cu e acusacion ta “contra un hende cu a menasa di bay Tweede Kamer pa usa un hacha pa pone cabesnan lora, y a pensa si mester cuminsa cu mi.” El a gradici OM y e team di investigacion responsabel pa atende menasanan riba politiconan.

Autoridadnan a identifica e sospechoso un rato despues cu e video a plama online y a detene pa interogacion. El a keda deteni en conexion cu un investigacion di un division specialisa di polis cu sede na Den Haag cu ta atende menasa contra politiconan. E sospechoso mester a ser laga den libertad, pendiente di e decision di Fiscal tocante si e lo enfrenta acusacionnan penal.

Di acuerdo cu cifranan oficial, Ministerio Publico a ricibi 363 melding di menasa contra politiconan na 2024. Den 235 di e casonan ey, e menasanan a ser considera ofensanan penal. Estadistica pa 2025 no a ser publica ainda.

Den añanan recien, un rango di organisacionnan, ex-partidonan di politica, y hasta Su Mahestad Rey Willem-Alexander a adverti tocante residentenan cu ta birando mas duro cu otro, citando division social y un sentido creciente di ser decepciona pa politico y institutonan. Na comienso di e siman aki, e Instituto di Investigacion Social di Hulanda (SCP) a emiti resultadonan di encuesta cu ta sugeri cu e publico ainda ta harta di politica nacional, manera ta e caso pa varios aña.

Alrededor di 59% di ciudadanonan Hulandes awor ta sinti cu e pais ta bay den e direccion robes, y 60% lo duna e coleccion di esnan den e gobierno nacional un puntuacion malo. Un mayoria ta sinti nan mes impotente y frustra cu e gobierno, cu un encuestado ta yama esnan den e Gabinete un “grupo di burache” cu no a tuma responsabilidad pa e problemanan cu nan a priminti di soluciona.

Na april 2023, lunas prome cu e eleccion general anterior, alrededor di 62% a pensa cu Hulanda tabata bay riba e caminda robes, cu mas o menos mitar di nan referiendo specificamente na politica nacional. Preocupacionnan economico a keda desde cu un periodo di inflacion halto a cuminsa despues cu Rusia a intensifica su invasion di Ucrania.

Hobennan adulto na Hulanda a keda specialmente frustra. Un encuesta di 2024 a haya cu casi tur hende Hulandes di 16 pa 34 aña di edad a experiencia problemanan di salud mental, cu hopi ta cita incertidumbre, miedo di fracaso, y un sentido general di miedo. Esaki a subi durante e pandemia di coronavirus, y no a baha segun cu hobennan ta keda enfoca riba e crisis di vivienda continuo, asuntonan di costo di bida, cambio di clima y conflictonan mundial.

Polis a enfatisa cu politiconan mester por eherce nan tareanan libremente y sin miedo. “Esey ta e fundeshi pa e bon funcionamento di nos democracia,” un declaracion di polis a bisa.