Utilities Aruba NV: Enfoke principal pa futuro ta riba transicion di energia pa yuda reduci tarifa di awa cu coriente

Recientemente director interino di Utilities Aruba NV, Joseph Everon a presenta e plannan pa futuro pa Utilities Aruba NV y e direccion cu gobierno keri tuma pa e cu e temporada di gobernacion. Den esaki el a elabora riba e tema di transicion energetico y cual ta e metanan cu e compania tin pa aumenta e penetracion di energia renobabel den e red electrico.

Everon a remarca cu e plan nacional pa futuro tin diferente area di atencion cu nan ta bay atende cune y alabes nan tin strategianan delinea conhuntamente cu WEB Aruba NV y NV ELMAR pa nan por logra e metanan cu tin nan dilanti.

El a splica cu un di e enfokenan grandi cu nan tin ta stabilisacion di e red di coriente. Aki, el a sigui splica, e enfoke ta bay ta pa no solamente tin un bon stabilidad den e red di coriente, pero tambe confiabilidad. El a agrega cu den esaki lo enfoca tambe riba automatisacion di e red y ‘smart metering’.

Everon a indica cu un di e enfokenan mas grandi cu Utilities tin tambe ta reduci e emisionnan di carbon. Den esaki e meta ta pa traha riba e recursonan di distribucion di energia cual ta facilita e proceso pa cu e maneho di introduccion di solar panels na cas y companianan den industria. “Pa cu esey mester di un red stabiel y automatisa. Conhuntamente cu WEB y ELMAR lo traha riba esey, e parti di descentralisa e generacion di coriente,” el a subraya.

El a indica cu un aspecto importante pa e compania ta cu mester tin un prijs pagabel y aki ta caminda e enfoke ta bay ta riba e structura di tarifa, programanan pa spaar energia pa ta mas eficiente, siña hendenan con pa bay om cu e programanan aki.

Otro parti cu Everon tambe a enfatisa ta hopi importante ta electrificacion di transporte publico. Esaki ta nifica cu lo enfoca pa companianan cu ta traha den e sector di transporte bay mas den direccion di electrifica transporte.

Pa loke ta trata energia renobabel, el a splica cu un di e mehoracionnan mas grandi cu Utilities kier trece ta introduccion y aumento di penetracion di energia renobabel. Esaki, el a indica, nan lo haci a base di molina di biento.

El a sigui splica cu nan ta bay expande na Vader Piet cu tereno di Rincon y expande e capacidad di energia di molina di biento hunto cu WEB y ELMAR. Di dos fase, el a indica, ta bay ta “repowering” di Vader Piet, cambia e molinanan cu tin pa molina mas grandi pa asina por yega e metanan cu nan tin delinea.

Everon a splica cu pa mas energia renobabel bateria ta un aspecto clave. Segun el a informa ya caba nan ta bezig cu e ultimo estudionan pa nan haya sa e capacidad y size di bateria cu mester pone.

Adicionalmente, el a agrega, hunto cu automatisacion cu nan ta bay implementa, locual ta ser yama ‘maneho di sistema di energia’, e parke solar na San Nicolas ta bay haya un di dos fase. El a splica cu na e momento aki nan ta terminando cu e ultimo estudio pa por amplia e parke number dos di Sunrise Solar Park.

Pa loke ta trata regulacionnan, el a splica cu un parti importante cu nan ta bay traha riba dje ta e corporate governance y statutonan di Utilities Group den su totalidad.

Everon a sigui splica cu nan ta bay traha tambe riba politica di interconexion. “Si bo kier bay mas den energia renobabel riba base comercial, pero tambe di cas nos tin cu bin cu un politica di energia cu ta actual na e momentonan aki mirando cu tecnologia di inverter a cambia hopi, dus nos tin cu bin cu un bon politica pa cu interconexion,” el a remarca.

El a agrega cu otro aspecto cu nan ta bay introduci ta e marco regulador (regulating framework) cu ta bay man den man cu e structura di tarifa cu e compania ta trahando riba dje.

Pa cu e maneho di desperdicio na Aruba, Everon a enfatisa cu Utilities tin un rol hopi importante den esaki conhuntamente cu WEB y ELMAR, pero tambe cu AWSS. El a splica cu nan a cuminsa aworaki structura con e enfoke ta bay ta pa bin cu e plannan necesario pa esaki. “Mi ta kere cu nos ta hunga un rol hopi importante den maneho di desperdicio y yuda cu e problema aki na Aruba,” el a declara.

Otro enfoke grandi cu e compania tin ta riba fuel. El a splica cu e plan strategico aki nan kier purba reduci e uso di fuel, pero mientras cu ta usando fuel, el a indica, nan mester busca manera pa tin un fuel mas pagabel cual na su turno ta traduci su mes mesora den reduccion di tarifa y tambe pa cu e emisionnan.

Everon a sigui splica cu nan mester tira bon bista riba e fuel supply y wak con ta trece fuel Aruba. El a indica cu conhuntamente cu RdA y FMSA ta trahando riba esaki, pero alabes ta trahando tambe pa mira ki tipo di fuel por usa cu lo reduci e costonan di fuel, cual ta e costo mas grandi, pero na mesun momento mantene e calidad cu nan mester tin.

“Una bes cu bo trece un miho calidad di fuel, e mantencion por mehora na WEB riba no a motornan. Si bo mehora bo calidad di fuel tambe bo lo por spaar hopi na costonan di mantencion y operacion na WEB. Cu e strategia aki nos ta trahando riba esey pasobra na final di dia nos kier reduci e uso di fuel, pero tambe e costo di fuel cu tin impacto directamente riba tarifa,” Everon a enfatisa.

Por finalisa, el a splica cu riba termino largo, basa riba estudionan, nan ta wak kico e mix di energia ta bay ta miho pa futuro mirando e demanda, e tecnologianan cu ta bay tin, con e red ta bay reacciona cu mas penetracion di energia renobabel y ki impacto ta bay tin riba economia. “E ta un plan integral pa wak precies e stapnan y den ki añanan ta haci inversionnan pa tin un produccion confiabel, pagabel y sostenibel pa Aruba pa asina tuma decisionnan balansa,” el a subraya.