Durante un conferencia di prensa ayera mainta Joseph Everon, director interino di Utilities Aruba NV, a duna un splicacion amplio riba e situacion actual y e pasonan pa futuro di e compania. Un di e topiconan cu el a trece dilanti ta e maneho di e compania AWSS (Aruba Wastewater Sustainable Solutions) cu ta encarga cu e maneho di RWZI.

Manera ta conoci dia 1 di juli 2024 Parlamento di Aruba aproba e ley cu a haci posibel cu a transferi e maneho operacional di RWZI for di DOW pa AWSS. Everon a splica cu loke nan a tuma over ta e full e riooleringstelsel, e operacion y mantencion di esaki, nan a tuma over e tres plantanan cu ta procesa awa preto y a tuma over e incinerator na Parkietenbos caminda desperdicio medico y otro desperdicio ta ser kima.

El a indica cu ainda nan ta den proceso pa traspasa e ekiponan tambe, cual mester tuma luga via un landsbesluit.

El a splica cu na momento cu nan a tuma over e plantanan, esakinan tabatin nan “edad” caba. El a remarca cu den tecnologia pa plantanan robusto si tin un operacion y mantencion apropia y un actualisacion na tempo y cu plannan structural, tecnicamente e plantanan por “biba” mas largo.

El a sigui splica cu hopi di nan no tabata yega nan capacidad di operacion. Awor nan a haya un team di persona cu ta motiva cu lo haci tur cos posibel pa tin e plantanan operacional. “Den prome bista locual no tabatin ta recurso, recurso tabata limita, ni un maneho structural y dirigi,” el a subraya.

Everon a indica cu un parti hopi importante tambe ta assets management, cual ta e maneho di structura con ta bay purba mantene e condicion di cada ekipo manera cu e la ser diseña.

Everon y su ekipo a ser apunta dia 18 di juni y el a splica cu nan a tuma nan tempo pa dilanti cu nan plannan y informacion pasobra nan tabata kier a haci un evaluacion prome pa asina na por sa kico ta e condicionnan cu tin y con ta bay atende cu esaki. .

El a splica cu nan a haci evaluacion riba tur planta y ekipo y hasta e parti organisatorio. El a indica cu nan a desaroya, y ta sigui desaroya, pasobra e ta un proceso continuo, un programa pa maneho e planta y ekiponan, e assets management program. El a splica cu e programa cay ta practicamente un plan tocante con nan ta bay hiba e plantanan existente cu nan a haci inversion den dje caba na nan maximo capacidad.

El a splica cu esey ta bin door di renobacion y rehabilitacion, y tambe expansion caminda mester haci esaki. Ademas di esaki tambe e ta contene un actualisacion di e sistemanan tanto den e plantanan y e stacionnan di pomp rond di e isla y tambe pa por provee un bon servicio na comunidad pa loke ta trata e maneho di awa preto.

Everon a sigui splica cu nan lo mehora tambe e producto final pa re-usa e awa mester enfoca riba calidad di awa. El a indica cu nan ta bay implementa procesonan pa mehora e calidad di awa pa asina reduci e impacto riba medio ambiente y ecosistema.

Apart di esaki, el a agrega otro parti hopi importante ta pa mehora e infrastructura y facilidadnan pa e personal.

Den e parti organisatorio Everon a indica cu mester mehora e programa di operacion y mantencion pa asina sigura cu e sistema di operacion ta na luga pa un bon operacion, pero tambe pa un bon mantencion. El a remarca cu ta importante pa sigura cu nan empleadonan ta compronde e filosofia aki y alabes mester duna nan e recursonan pa por cana e programa aki.

El a enfatisa cu otro punto di importancia, specialmente den e situacion cu nan ta trahando ta salud y seguridad (health & safety). El a indica cu proceduranan y regulacionnan ta hopi importante, sobretodo e regulacionnan y hunto cu e stakeholdernan nan lo traha pa yega na esaki.

Everon a splica cu nan ta trahando riba un business continuity plan, cu ta delinea kico mester haci na momento cu tin calamidad of black out. El a recorda con algun luna pasa ora cu tabatin e blackout general na Aruba, awa preto a bin ariba. El a indica cu e tipo di situacionnan ey mester ser soluciona door di tin un plan di contingencia na luga pa ora cu tin por ehempel un blackout, tin proceso cla di con mester reacciona pa preveni e tipo di cosnan asina sucede atrobe.

“Mester structura e manera di traha den compania tanto den e parti di operacion y mantencion como tambe den e parti di administracion. Mester tin un proceso bon delinea. Hopi importante pa nos empleadonan ta training y desaroyo pa tin personal capacita cu ta haci e trabou y cu tin tur ekipo pa haci esaki,” el a subraya.

Pa traha riba mehoracion di e calidad di awa, Everon a splica cu a cuminsa cu un campaña di midi mas e calidad di awa, pero tambe otro aspectonan cu mester midi pa sa con e maneho ta y unda mester mehora. El a indica cu unda cu mester nan lo zorg pa tin un contract cu laboratorionan tanto internacional como local cu por duna e servicio pasobra calidad di awa ta importante.

Tocante e awa cu ta sali di Bubali Plas cu ta bay lama, el a indica cu nan ta bay implementa un team cu lo traha riba e aspecto aki, specificamente ora ta trata di habri y cera e candal cu tin pa laga e awe sali. El a splica cu ta nan ta bay bin cu un protocol con y ki ora e candal aki por ser habri, sigurando alabes cu e calidad di awa tama ta dentro di parametronan cu no ta dañino pa salud ni medio ambiente. Pa cu esaki nan lo bin cu un proyecto hunto cu DOW y parke pa implementa e protocol pa e candal.

Everon a agrega cu na tur planta di RWZI nan ta bay haci un evaluacion di impacto riba medio ambiente (environmental impact assessment) caminda nan ta bay haci estudionan pa cumpli cu tur e normanan di medio ambiente. Ademas nan lo realisa un nulmeting y for di esey ta bay tin mehoracion unda cu mester pa cuida e medio ambiente.

El a informa cu ya caba e ekiponan di midimento a yega y e ekiponan aki ta bay midi e calidad di aire rond di e plantanan pa 24/7 pa asina haya sa ki efectonan e plantanan por tin riba medio ambiente pa minimalisa of keda den e normanan cu ta estableci.

Everon a indica cu e situacion na Bubali ta critico. Segun el a splica niun di e ekiponan ta trahando. Pero esaki, el a señala, no por verwacht nada otro si no tabatin e recursonan necesario pa e planta duna su fruto.

El a splica cu tin un sistema di un contrato cu nan a hereda cu a ser instala sin un diseño apropia. El a indica cu ta trata di un contrato caminda ekipo a ser entrega pero no a haci esaki a base di un diseño ni tecnologia cu ta pas cu e planta ey.

Everon a remarca cu a pesar di tur rapport cu a duna conseho negativo, e sistema a ser cumpra y a ser instala. Den luna di september e compania encarga ta bay tin e test di productividad. El a splica cu nan mester laga e compania haci e test, pero mientras tanto nan ta pensando riba un plan B.

Otro parti importante cu Everon a trece dilanti ta e maneho di sludge. El a splica cu tur dia tin 6 pa 10 truck ta core pa Parkietenbos cu sludge, di cual mayoria di dje ta awa. El a indica cu nan lo bin cu un proceso bon tocante con ta bay maneha sludge pa asina no mester di tanto truck pa bay Parkietenbos.

Pronto nan lo cuminsa cu e ehecucion di e plan aki caminda cada planta lo tin su sistema pa maneha sludge cu ta permiti pa maneha sludge na un manera responsabel, cu ta bon pa medio ambiente y caminda practicamente e residuo minimal ta ser transporta pa Parkietenbos.

Por ultimo, pa loke ta e sistema di rioolering y pompstacionnan, el a splica cu hunto cu e team nan ta bay haci inspeccionnan pa actualisa e programa caminda ta identifica unda e liñanan di e sistema ta core y e condicion di e tur ekiponan instala pa asina por bisa cuanto e inversion lo ta y kico ta bay costa nan pa e mantencion of pa trece e sistema di rioolering na e nivel cu e mester ta