Secretario di Estado pa Relacionnan di Reino, Alexandra van Huffelen a bisa cu durante su proximo bishita na Aruba, Corsou y Sint Maarten e siman aki, ta bay discuti e posible maneranan den cual Hulanda por yuda pa combati pobresa na e paisnan.
Van Huffelen a bisa esaki durante un debate den Comite Permanente pa Relacionnan di Reino di Tweede Kamer siman pasa, segun The Daily Herald a reporta. E topico principal di e debate aki tabata e establecimento di un minimo social pa Bonaire, Sint Eustatius y Saba y e aumento di pobresa.
Parlamentario di partido iskierdista GroenLinks, Kauthar Bouchallikh, a trece dilanti e aumento di pobresa na Aruba, Corsou y Sint Maarten. Den su opinion, Hulanda ainda tin un responsabilidad pa cu e islanan y nan pueblonan, maske nan ta paisnan autonomo den Reino Hulandes.
Bouchallikh a bisa cu e pobresa extenso na e paisnan ta un “preocupacion mayor” pa partido GroenLinks. El a puntra con gobierno Hulandes tambe por duna asistencia na e paisnan aki, banda di e ayudo cu Hulanda ya a duna na e entidadnan publico Hulandes – Bonaire, Sint Eustatius y Saba – y con gobierno Hulandes lo por garantisa cu e derechonan humano basico tambe ta wordo cumpli den e paisnan di Caribe Hulandes.
E sugerencia aki a conduci na un reaccion inmediato di parlamentario Roelien Kamminga di e partido liberal democrata VVD, cu a puntra con Bouchallikh ta mira riba e propio iniciativanan di e paisnan pa eradica pobresa, considerando cu e paisnan ta carga nan propio responsabilidad den esaki. “Den opinion di VVD, esaki ta un tarea cu e paisnan mes mester asumi”, el a bisa.
Parlamentario pa partido Cristian Democrata CDA, Joba van den Berg, a comenta cu e paisnan no por solamente tin tur beneficio sin cu ta haci sacrificio di nan banda. “E ta tuma dos hende pa baila tango. E paisnan tambe mester implementa reformanan pa sigura bon gobernacion, finanzas solido y seguridad social decente. Nan tambe mester ta dispuesto pa haci adaptacionnan. Na Hulanda, nos tambe tin biaha cu mester tuma medidanan cu ta haci dolor. E paisnan por conta cu nos inversionnan, colaboracion y sosten, pero nan mester tuma medida”, el a bisa den su reaccion.
Sinembargo, e reaccionnan aki no a disuadi Bouchallikh den su punto di bisa. El a agrega cu Hulanda tin un co-responsabilidad den Reino Hulandes cual ta crea door di e historia comparti, pa cual historicamente ta mira cu e islanan ta den un posicion di desbentaha. “Mi ta haya cu mester haci mas pa e pueblo na e paisnan cu ta bibando den pobresa”, el a comenta, agregando cu “esaki tambe ta bay haci e paisnan mas fuerte.”
Secretario di Estado pa Relacionnan di Reino, Alexandra van Huffelen a comenta di su banda cu en berdad Hulanda tin un relacion diferente cu e paisnan autonomo compara cu Hulanda Caribense (Bonaire, Sint Eustatius, Saba), cual ta parti di Hulanda. Sinembargo, el a priminti cu ta bay evalua pa mira unda Hulanda por ofrece ayudo na Aruba, Corsou y Sint Maarten pa combati pobresa. El a nota cu tambe a menciona e topico aki den e landspakketnan pa cada pais.
E siman aki, e Secretario di Estado ta bay ta di bishita na tur tres pais, cuminsando cu Sint Maarten, pa discuti e implementacion di e landspakkentnan, e reformanan y pa papia di e propuesta di ley pa establece e Organo Caribense pa Reforma y Desaroyo, COHO.
Secretario di Estado Van Huffelen a bisa cu e tambe a observa cu pobresa ta un problema grandi na e paisnan, specialmente cu e inflacion halto y e aumento den e costo di bida cu ya tabata halto. El a bisa cu e ta dispuesto pa discuti maneranan pa eradica pobresa hunto cu e paisnan ora e yega e siman aki.
E Secretario di Estado tambe ta bay haci un bishita na Bonaire e siman aki pa observa e magnitud di e daño cu a wordo causa pa e inundacion como resultado di e yobidanan extremo. El a bisa esaki den contesta na e preocupacionnan expresa pa varios parlamentario pa cu e daño na cas, edificio, infrastructura y naturalesa. E parlamentarionan a puntra tocante e asistencia di gobierno Hulandes pa hende cu a sufri daño na nan propiedad. Van Huffelen a bisa cu e ta bay discuti esaki durante su bishita na Bonaire.
Parlamentario pa partido BIJ1, Sylvana Simons, kende tambe a papia den nomber di Partido pa Animalnan PvdD, durante e debate a puntra tocante e santo na beach na Chogogo Resort na Bonaire cu a bay den lama cu e yobida fuerte pa motibo cu e muraya di retencion no a traha bon. Van Huffelen tabata di acuerdo cu Simons cu e asunto di adherencia na permiso, supervision y cumplimento ta rekeri atencion na Bonaire. “Mester tin proteccion y cumplimento. Mester ta cla cu evadi regulacionnan no ta tolera”, el a bisa.
Tocante su bishita na Aruba, agenda oficial di Secretario di Estado Van Huffelen ta indica cu e ta bay bishita Archivo Nacional Aruba (ANA).
Potret di Suzanne Koelega
