(NLTimes) – Autoridadnan Hulandes ta bisa cu sabornan ilegal di vape for di China ta birando cada biaha mas popular entre hobennan Hulandes, sinembargo e ministerio di Exterior nunca a formalmente atende e problema cu oficialnan Chines, ni sikiera durante minister Veldkamp su bishita na China den 2025, segun investigacion di Argos y The Investigative Desk.
E vapenan aki, hopi biaha conteniendo nivelnan excesivo di nicotina, a contribui na hospitalisacion entre hobennan. Aña pasa, 14 hoben aparentemente a ricibi tratamento na hospitalnan Hulandes despues di usa e productonan aki.
Productornan Chines aparentemente ta ignora den gran parti e prohibicion riba vape cu sabor ora di exporta esaki pa Hulanda. Na China, vapenan cu fabor ta prohibi desde 2022 – 2 aña prome cu e prohibicion Hulandes – sinembargo e fabricantenan ta sigui produci pa mercado den exterior, mas tanto e mercado Europeo. China ta produci alrededor di 80% di vape na nivel mundial, dunando e pais practicamente un monopolio riba e suministro global.
Un mercadista Chines a confirma na Argos y The Investigative Desk cu e ta conscientemente provee vape pa e “mercado shinishi,” refiriendo na e mercado ilegal. Tambe e ta ofrece garantia di delivery, primintiendo cu e ta bolbe manda carga gratis si aduana intercepta esaki, como parti di su politica “after-sales.”
