(AFP) – E biahe di Papa Leo XIV na Sur America otro luna ta bay door segun planea, Vaticano a bisa dialuna, confirmando e bishita papal casi dos siman despues di e cirugia di cancer di pulmon di e pontifice.
“Oficina di prensa di e Santo Sede ta confirma cu e Biahe Apostolico di Papa Leo XIV na Uruguay, Argentina y Peru, programa pa dianan 6-17 di november 2026, ta bay door segun e programa publica anteriormente,” Vaticano a bisa den un nota.
Leo, 71, a ricibi un cirugia exitoso dia 13 di october na hospital Gemelli di Roma pa retira un tumor canceroso den e parti abao di su pulmon banda drechi. El a sali dia 17 di october, cu su ciruhano, Stefano Margaritora, bisando cu e tabata den un “condicion clinico absolutamente satisfactorio.”
Maske Margaritora a bisa cu “no tabatin motibo clinico” pakico e biahe na Sur America no por a bay door, algun observador di Papa a specula cu por a modifica e biahe di algun manera.
Vaticano a bisa diabierna cu Leo lo cancela un biahe planea pa Assisi dia 27 di october, riba recomendacion di su dokternan.
Dialuna, Vaticano a bisa cu e Papa tabata anticipando “cu hopi goso y entusiasmo” e biahe.
“Mi ta anticipando bolbe na e continente unda mi a experencia asina hopi momento di mi bida,” e Papa a bisa, kende a pasa dos decada na Peru como misionario.
Vaticano a revela diaranson cu Leo lo no mester mas terapia, cu test mustrando cu e cancer tabata “localisa.”
E Papa a reanuda su trabao gradualmente, “ahustando su schedule diario den consulta cu su dokternan pa duna prioridad na su recuperacion mientras ta continua cumpli cu e responsabilidadnan di su ministerio,” Vaticano a bisa.
E Papa tabata “kedando atento na e necesidadnan di cada dia y permitiendo periodonan adecuado di descanso,” a bisa, agregando cu Leo tabata “profundamente agradecido pa e oracion y cariño cu el a ricibi for di henter mundo.”
