“Bo no ta bin na remarca pa asilo y bo no mester acudi na nos mas.” Esey locual ‘Maite Garcia’, 26, a haya di tende di DIMAS. Maite, cu no ta su nomber di berdad (redaccion conoce nomber) ta di e miles di Venezolano cu ta na Aruba den forma ilegal. Miles cu no ta ricibi sosten financiero, pero supuestamente no ta permiti pa traha.

‘Maite’ ta trahando los. A pesar cu e no ta permiti. E hoben gradua di universidad na Venezuela a bin Aruba cu avion na comienso di 2019, despues cu su amiga na Aruba a bis’e pa bin. “El a convence mi pa bin Aruba, cu aki lo mi haya trabou sin problema,” Maite a conta. “Mi tata mes ta na Merca y a manda busca mi ruman chikito for di Venezuela. Pero ami tabata mayor di edad caba y mi no por a bay Merca.” Manera hopi otro, e motibo cu Maite a laga Venezuela ta pa motibonan economico. Y ta net e motibo ey ta dificulta su situacion awor aki.

Amiga

Su amiga na Aruba ta legalmente riba e isla y ta casa. Pues, Maite a bisa cu e no tabatin motibo pa duda, ora cu su amiga tabata ward’e pafo di aeropuerto. Pero e prome señal di complicacion a bin un a dos dia despues. Pasobra e amiga a pidi Maite pa cuida su yiunan p’e, mientras cu e tabata bay traha. Pero e cuido di yiu a bin hunto cu otro trabou domestico. Y pa compens’e, Maite tabata ricibi 600 florin pa luna. “Pero a cambio mi mester a paga 400 florin pa luna pa por a keda na su cas,” Maite a conta. Pues, de hecho, Maite tabata brinda un servicio domestico pa apenas 200 florin pa luna.

Asilo

Despues a bin e yamada di DIMAS pa brinda Venezolanonan indocumenta opcion pa registra pa asilo. Maite tambe a bay. “Mi no a pidi asilo ora mi a drenta. Ma kere cu e situacion di trabou lo tabata manera mi amiga a sigura mi. Pero ora cu nos a haya oportunidad pa pidi asilo, ma haci uzo di esey. Sinembargo, ami a bay cu e impresion cu mi lo a haya un cita pa splica mi situacion. Pero e dia ey, a cambia e protocol y locual mester a haci ta pa haci cita via e website di DIMAS. Y berdad mi a haya e cita, pero djis pa yena e formularionan di asilo y lo a yama mi pa bolbe pa un combersacion.” Maite a solicita pa e asilo dia 20 di september 2019 y riba october 25 a haya unicamente su formulario como prueba cu el a pidi asilo. “Mi mester a acudi regularmente na DIMAS pa mustra cu mi ta cumpli, pero sin fecha pa haya e combersacion. Mi a haya e formulario pa mustra cu berdad mi a pidi asilo. Sinembargo, DIMAS a enfatisa cu mi, cu articulo 19, inciso 6 di e Toelatingsbesluit no ta aplica pa mi, cu mi no por traha.”

Y aki ta unda e dolor ta sinta. Pasobra ya Maite no por a keda na su amiga cu a abusa di su trabou. Keda sin busca trabou no tabata un opcion. “Asina hopi Venezolano a haya nan mes ta busca trabou den forma ilegal. Ki otro forma tin?” Maite a bisa.

Condominio

Y ta e hecho cu e personanan aki ta traha den e circulo ilegal ta haci nan vulnerabel pa abuso. Maite a logra haya trabou pa dia via companianan di servicio cu ta haci apartamentonan/condominionan limpi. “Tur e condominio grandi, manera Oceania, Oasis, casi tur ta opera manera hotel. Y nan ta busca servicio di companianan cu generalmente ta den man di un persona. Ta e persona aki e ora ta busca trahadonan pa haci e cambernan limpi. Nos tabata haya uniform pa bisti, pero no tabata permiti pa uza nan riba caya.” Maite tabata ricibi un averahe di 1000 florin pa luna, y no tabata kita nada di dje. Pero e ta conta si di otro cu si tabata paga AOV, AZV, SVB, pero cu e compania mas bien no tabata entrega e sumanan aki na e instancianan.

Pandemia

E ‘shutdown’ na maart 2020 a pone un fin na e trabounan den condominio. No tabatin turista, y no tabatin trabou. Pero ‘suerte’ a toca Maite cu a logra haya un trabou como domestico na un famia na Noord. Door di e ‘shelter in place’ e mester a biba cu e famia y su trabou tabata pa mantene cas, haci limpiesa, haci cuminda. “Mi tabata traha siete dia pa siman, tin biaha te 11or di anochi. Un biaha te hasta te 4or di mainta y asina mes lanta un rato despues pa prepara desayuno.” E experiencia di Maite na e famia aki tabata un pesadiya, y e ta bira emocional y yora ora di corda e maltrato cu el a ricibi. “E ta manera ora bo ta mira den novela, y e forma con ta trata e empleado di cas manera cu e no ta bal nada como hende.” Y finalmente ora cu Maite no por a wanta mas y a dicidi di bay, e dunado di trabou ademas a dicidi pa desconta camisanan supuestamente daña for di su salario.

Venezuela no ta opcion

Pa Maite, bolbe Venezuela no ta un opcion. No tin entrada, no tin ningun perspectiva. Pero keda Aruba sin e oportunidad di traha, sin derecho algun tampoco ta e vision cu e hoben gradua den Business Administration tabatin. “Na mei, DIMAS a manda mi un e-mail cu ya mi no ta bay haya un cita pa papia cu nan riba mi peticion di asilo. Ma haya e e-mail na mei, y e carta mes tabata fecha april. Mas nan no a bisa mi.” E hoben e ora a tuma contacto cu e oficina local di United Nations High Commissioner for Refugees, UNHCR y te ainda ta wardando forma con e oficina aki por yud’e.

“Realidad ta cu si no bin un areglo, hopi di nos ta scondi y toch ta busca manera pa haya entrada. Nos mester come. Ami ta purba sobrevivi haciendo trabou domestico, a pesar di e abusonan cu hopi biaha ta pasa na man di otro. Pero no tur hende ta manera mi. Tin ta bay den direccion robes.” Y en todo caso, hopi ta sigui vulnerabel pa hopi abuso den man di dunadonan di trabou cu sa cu nan no tin forma pa entrega keho.

Hecho ta cu Maite awor ta na Aruba, dos luna despues di a ricibi notificacion di DIMAS cu e no mester acudi mas, pero sin claridad kico e mester haci. Mas ainda, e mes no sa kico autoridadnan di Aruba tin pensa di haci cune. “Nan no ta interesa pa sa unda mi ta.” Su speransa ta pa toch haya ayudo pa medio di UNHCR, y en todo caso, no bolbe Venezuela.

Bon Dia Aruba a tuma contacto cu e oficina di UNHCR na Aruba, y nan ta preocupa cu e desaroyo aki, y kier yuda. Pero mas no por a bisa. Ta pendiente informacion di e coordinado regional di UNHCR cu ta na Corsou pa atende Bon Dia Aruba riba e caso di Maite y e otronan cu a pidi asilo.

Tambe a tuma contacto cu oficina di DIMAS, pero despues di a yama henter merdia, no tabatin ni un operado pa contesta telefon.

 

LEAVE A REPLY

Please enter your comment!
Please enter your name here