ORANJESTAD – Ayera den oranan di atardi a tuma luga e Manifestacion di Venezolanonan, cual a wordo organisa mundialmente pa dia 23 di januari.
Prome cu 5or di atardi e hendenan a cuminsa yega na Plaza Bolivar di Oranjestad cu bandera, fleut y pancartanan. E alegria tabata presente cu tur hende cu a asisti na e yamada di e Manifestacion na nivel mundial pa e dia aki, 23 di januari, dia den e cual ta celebra e 61 aniversario di e caida di e dictadura di Perez Jimenez, y tambe na apoyo pa e Presidente di Asamblea Nacional, ken a keda huramenta ayera mes como Presidente encarga di e Republica Bolivariano di Venezuela.
Sr. Vicente Cristofore, ken tabata e persona encarga di pidi permiso pa e manifestacion na e departamento di polis na Aruba, a expresa cu ‘nos ta hopi contento, mi ta kere cu hopi Venezolanonan a bin pa apoya nos presidente encarga, y mi ta pidi Dios cu pronto Venezuela lo haya su libertad’.
