Observatorio Venezolano di Conflictividad Social (OVCS) a informa diamars pasa cu Javier Rosales, di 54 aña di edad, a bira e di siete victima fatal di e brutal reppresion di regimen di Nicolas Maduro desde 30 di april.
“El a keda herida di bala pa Guardia Nacional Bolivariano (GNB) diamars pasa, dia 30 di april, na Naguanagua, Carabobo. E di siete victima di represion den un siman,” e observatorio a publica riba nan cuenta di Twitter.
Rosales a fayece diamars atardi despues di un agonia di un siman na hospital. E victima tabata drentando e sector La Entrada hunto cu otro personanan pa atende e yamado di Guaido pa inicia e “Operacion Libertad”.
Luis Betancourt, coordinador di e ONG Foro Penal na Carabobo, tambe a referi na e hecho riba Twitter.
E adolescentenan Yoifre Hernandez Vasquez, di 14 aña; y Yosner Graterol, di 16, a muri diahuebs pasa despues di keda herida pa elementonan Chavista.
Diarason pasa a fayece na Caracas hoben Jurubith Rausseo Garcia, di 27 aña, mientras cu e dia anterior, ora e manifestacionnan a cuminsa, a perde su bida na estado Aragua, Samuel Enrique Mendez, di 24 aña di edad.
Tambe cerca di 200 persona a resulta herida, di cual dos a fayece, pa un total di siete.
E pio crisis economico di historia di e pais ta keda causa manifestacion y protesta den henter e pais, aunke no tabatin mas evento di magnitud di siman pasa.
