E ultimo par di dia mester ta un les duro, tanto na Venezuela como den exterior, pa esnan cu ilusion cu e dictadura lo a sucumbi pa e mero anuncio di e presidente interino cu Nicolas Maduro su tempo a caba. E les lo mester ta cu, no pasobra un manyen di militar a crusa pa bo banda, e resto ta sigui di mes. Pa logra esey lo mester sucede hopi mas. Y pakico? Pasobra nos ta papia aki di un regimen di maldad bon organisa, cu no ta haci caso ora ta haci yamado riba su efectivonan pa nan deserta.

E bon organisacion ey ta expresa tambe den e inclusion di elementonan Cubano den e structura militar, cu ta trece un monton di experiencia den represion sofistica di nan propio pueblo, manera e pueblo Cubano ta experimenta pa hopi decada caba.

Esey ta implica cu no tin speransa anto pa un cambio positivo na e pais aki? Sigur cu si, pero ta bon pa tene na cuenta kico ta e situacion real na Venezuela. Contrario na otro caso di busca con pa baha un dictadura, no tin un lucha arma cu ta forma un contrabalansa pa e poder arma cu e dictadura tin. Esnan cu den e circunstancianan aki ta papia di e menasa di un guera civil, por conseha nan pa revisa nan tesis. Despues di 20 aña di represion izquierdista bon organisa, cu ademas a desemboca den un narcodictadura, esaki ta haci nan gana mas grandi ainda pa defende e interesnan economico cu e elite politico y militar a acumula. E lidernan Chavista y e militarnan corupto sa masha bon cu no tin mañan pa nan, y e unico cos cu nan por haci ta defende cu alma y cuerpo e regimen aki, pa wanta mas largo posible e situacion actual unda nan ta reina cu poder absoluto, o en todo caso casi absoluto.

Nos no por caba di contempla e situacion curioso y peculiar, unda e dictadura aki, cu pa añanan largo tabata persigui, aresta y laga mata ken cu nan kier, mester tolera cu tin un muchachito di apenas 35 aña ta bay di un banda di e pais pa otro, nan sa unda e ta… y nan no por haci nada. Y pakico no? Den e dianan aki nos por mira atrobe cu e poder di represion, cu aparentemente tabata absoluto, a haya un contrapeso den forma di e menasa di poder militar Mericano, cu a dicidi cu ta te un cierto punto e dictadura aki por yega. A indica y a ripiti cu mishi cu Guaido lo haya un contesta rapido y contundente di banda Mericano. Y nan a comprende e mensahe aki ‘loud and clear’.

E situacion actual, despues di dos dia di confrontacion fuerte riba caya, por ta un decepcion pa miyones di Venezolano, tanto na e pais mes como den exterior, pasobra e tan espera collapse di e structura militar no a tuma lugar. Esey ta un realidad, pero tin mas realidad. Tin un oloshi ta sigui cana cu no ta na fabor di e regimen y esey ta e punto debil di tur regimen socialista. Esey ta cu nan no por maneha un pais drechi pasobra nan pensamento di yega na dominio politico completo di bida economico cada biaha ta dal den e muraya di realidad di bida, y nan no ta siña. Ta imposible y inimaginable cu nan ta cambia nan ideologia y nan modelo economico. Nan ta manera un chauffeur cu a pega cu su auto den santo los, y ta keda purba saca e auto castigando e motor, causando cu cada biaha e auto ta keda mas hundo den santo. Exactamente esey ta pasando den e dianan aki tambe, unda cu Nicolas Maduro a bolbe anuncia un aumento di salario minimo, basa riba emision di placa cu no tin un respaldo den produccion economico. Prome cu e aumento a bay na vigor, ya prijsnan di producto di consumo popular a sigui aumenta, cu consecuencia cu e hiperinflacion a bira mas fuerte ainda. Un salario minimo cu apenas ta yega na equivalente di 3 dollar Mericano, ta bisa suficiente tocante e bida cu e gran mayoria di e pais mester biba.

Cu esaki nos mester saca e conclusion cu no ta bay tin un intervencion militar Mericano, a menos cu e Chavistanan aresta Guaido? Probablemente no, y tin motibo pa pensa cu gobierno Mericano ta conta cu nan strategia di strangula e regimen financieramente lo funciona y ademas ta conta cu e incapacidad di gobierno Chavista pa cambia rumbo economico. Pero kico esaki ta implica a corto plazo pa e poblacion? Mas miseria, y ora ta kere cu a yega na e limite, ta resulta cu cos por bay mas malo ainda.

Y kico mundo ta haci mientras tanto? E paisnan Europeo y Latinoamericano ta bin cada biaha cu tremendo declaracion, unda ta parce cu Garcia Marquez y Vargas Llosa a combina forsa pa trece un documento pa warda pa historia, pero cu no tin efecto real. E paisnan Europeo den caso di Siria a scoge banda y a participa den un lucha arma. Y Venezuela, na merced di e ISIS comunista aki, nan por haya un bunita proclamacion.

LJMADURO 01-MEI-2019