(NLTimes) – Gobierno Hulandes a confirma liberacion di tres di su ciudadanonan cu tabata cera den prison na Venezuela. Minister di Asuntonan Exterior, David van Weel, a bisa cu e tres presonan a ser laga den libertad diahuebs atardi. Nan lo bandona e pais mas liher posibel bou escolta brinda pa e embahada Hulandes na Caracas, Van Weel a confirma prome cu e reunion semanal regular di Gabinete diabierna.

E regimen autoritario di e dictador Venezolano, Nicolás Maduro a termina casi dos siman pasa, ora cu e y su casa a ser captura pa forsanan militar Mericano y transporta pa Merca pa enfrenta acusacionnan criminal. Desde e tempo ey, decenas di preso politico, y otro personanan encarcela, a ser poni den libertad den e pais Sur Americano.

E tres detenidonan Hulandes no tabata inicialmente entre esnan cu a sali den libertad. Un vocero di e ministerio no kier duna comentario riba e motibo cu nan a keda encarcela, pero fuentenan a bisa Trouw cu dos di nan tabata parti di un tripulacion di nuebe persona cu tabata busca restonan di Segunda Guera Mundial cerca di Caribe Hulandes den un intento pa recupera material di koper.

Tur nuebe a ser intercepta pa Marina di Venezuela siete luna pasa, y transporta pa e pais ey riba acusacion di spionahe. E capitan di e tripulacion ta un homber Hulandes, y su casa tabata entre esnan encarcela. No a haya informenan publica tocante e identidad di e di tres persona.

Van Weel a bisa cu el a defende personalmente pa nan liberacion den un yamada telefonico cu e presidente interino di Venezuela, Delcy Rodríguez. E embahada Hulandes “tambe tabata persigui esaki pa un tempo”, e minister a bisa. “Y finalmente, e regimen a bisa ok, e tresnan aki por bay tambe.”

Su remarcanan tabata e prome confirmacion di parti di e ministerio tocante e destino di e detenidonan Hulandes den e pais. Van Weel a indica caba dialuna cu el a papia cu Rodríguez, kende tabata fungi como vice presidente ora cu el a tuma encargo di e pais despues cu Maduro a ser captura.

Van Weel a skirbi riba medionan social dialuna pa bisa cu nan dos tabatin un combersacion productivo, y tabatin “progreso” riba asuntonan importante pa ambos pais, incluyendo e liberacion di presonan stranhero. Tambe el a enfatisa e importancia di “tene nos canalnan di comunicacion habri.”

Venezuela ta e pais mas grandi cu tin frontera cu e nacionnan insular Caribense y teritorionan di Reino Hulandes. Aruba, Boneiro, y Corsou ta djis algun kilometer panort di e costa Venezolano.

Diaranson, un tanker cu ta transporta petroleo Venezolano a mara na Corsou como parti di un plan di dos di e companianan di mercancia mas grandi di mundo pa move petroleo Venezolano pa facilidadnan di almacenahe den Caribe. Tabata spera cu e Grupo Trafigura y e Grupo Vitol lo tuma posesion di por lo menos 4.8 miyon bari di crudo Venezolano e siman aki, Bloomberg a informa anteriormente.

E petroleo ta forma parti di un benta grandi di mas di 50 miyon di bari organisa pa Merca. Bloomberg a informa diamars cu cuatro tanker tabata na costa Venezolano, cu plannan pa trece petroleo crudo pa instalacionnan di almacenahe na Corsou y Bahamas.