Asamblea Nacional a aproba ayera un ley cu ta regula adhesion na e Tratado Interamericano di Asistencia Reciproco (Tiar), riba solicitud di diputado Nora Bracho.
E tratado ta data di aña 1947 y ta un pacto internacional cu ta permiti e nacionnan cu a ratifica esaki mantene un sistema di ayudo mutuo den caso cu un pais ser ataca pa otro pais, sea, a traves di ayudo mutuo, den caso cu esaki ta necesario. Venezuela tabata entre e prome paisnan cu a ratifica e tratado, sin embargo, na 2012 Hugo Chavez a dicidi pa Venezuela retira di e tratado, hunto cu Bolivia, Ecuador, Nicaragua. E paisnan aki a pasa na funda un aña despues, na 1948, e Organisacion di Estadonan Americano.
Di parti di e regimen di Nicolas Maduro ta bin e critica cu oposicion ta preparando tereno pa un posibel intervencion militar na e pais. Di otro banda, oposicion ta argumenta cu ya tin caso caba di intervencion na e pais. Diputado Gilmar Marquez di Voluntad Popular a enfatisa cu e meta di e tratado ta pa proteha e paisnan cu ta forma parti di esaki contra intervencion, manera ta pasando actualmente na Venezuela, manera e entrada di gruponan paramilitar y di guerrilla, como tambe di e Cubanonan den e basenan militar di e pais.
Pa cera e debate, e presidente di Asamblea y presidente interino di Venezuela Juan Guaido, a bisa cu “mas di 7 miyon Venezolano ta den un situacion di emergencia y Venezuela mester cambio (…) Nos ta sigui busca e mecanismonan pa supera e crisis na Venezuela, e ruta ta cla pa atende e emergencia humanitario, pa supera e tragedia.”
